АБАЙ МҰРАСЫН ҰЛЫҚТАҒАН ЖАС ӨРЕНДЕР

Шымкентте оқушылар арасында «Абай оқулары» атты поэзия байқауы өтті. Ұлы ақынның туған күнінде 30 жас өрен бір сахнаға жиналды. Шара барысында жастар Абайдың мағынасы терең, тағылымы мол өлеңдерін жатқа оқып, өзара бақ сынады.

А.С. Пушкин атындағы кітапханада ұйымдастырылған тағылымды шараға қала мектептерінің оқушыларымен қатар кітапхана қызметкерлері, оқырмандар мен әдебиет сүйер қауым қатысты. Байқаудың басты мақсаты – Абай Құнанбайұлының шығармашылық мұрасын насихаттап, ақынның өлеңдері мен қара сөздерін жас ұрпақ арасында кеңінен таныту.Осы мақсатта сахнаға шыққан әрбір оқушы ұлы ақынның шығармаларын өзінше өрнектеп, Абай әлеміне деген құрметін өлең арқылы жеткізді. Бірі білім мен ғылымды дәріптеген өлеңдерін оқыса, енді бірі адамгершілік пен елдікке үндейтін туындыларын паш етті.

 Поэзиялық кеш жас ұрпақтың әдебиетке деген қызығушылығын арттырып қана қоймай, Абай мұрасын жүрекпен сезінуге мүмкіндік берген рухани кездесуге айналды. Сала мамандарының айтуынша, ақын шығармашылығын жас буын арасында насихаттауға бағытталған мұндай шаралар тек Абай күнімен шектелмейді. Жыл бойы түрлі әдеби-мәдени жобалар ұйымдастырылып, жастардың шығармашылық қабілетін дамытуға басымдық беріледі.

Ұлы ақынның сөзімен сусындаған жас өрендер үшін бұл байқау әдебиетке деген сүйіспеншілігін арттырып, Абай әлеміне тағы бір қадам жақындаған ерекше мүмкіндік болды. Ал Абайдың өнегелі өлеңдерін жатқа айтқан жас буынның бұл талпынысы – ақын мұрасының келер ұрпақпен бірге жасай беретінінің айқын көрінісі.