POLPHARMA SANTO ЖАҢА БРЕНДІ ТАНЫСТЫРЫЛДЫ

Шымкенттегі фармацевтика саласында маңызды әрі ауқымды жаңалық. Елдің дәрі-дәрмек өндірісін жетілдіру бағытында ірі зауыт ретінде танылған «Химфарм» өзінің жаңа корпоративтік бренді – Polpharma SANTO сауда маркасын ресми түрде таныстырды. Жобаның жалпы инвестиция көлемі 130 миллион АҚШ долларынан асқан. Іс-шараға қала әкімі Ғабит Сыздықбеков, Қазақстан Республикасы Денсаулық сақтау вице-министрі Тимур Мұратов және Polpharma тобының Бақылау кеңесінің төрағасы Ежи Старак қатысты. Шымкент қаласының әкімі Ғабит Сыздықбеков өзінің құттықтау сөзінде: «Бұл жобаның жүзеге асуы Шымкенттің ғана емес, бүкіл еліміздің фармацевтика саласын дамытуға жаңа серпін», – екенін айтты.

Polpharma SANTO бренді – бұл Қазақстанның фармацевтика индустриясында сапа, инновация және жауапкершілік тұжырымдамаларын жаңа деңгейге көтеру мақсатында жасалған стратегиялық бастама. Осы брендтің арқасында компания отандық және халықаралық нарықтарда өзінің бәсекеге қабілеттілігін айқын көрсетуді көздейді. Жаңа сауда маркасы тек қазақстандық дәрі-дәрмектердің сапасын арттырып қана қоймай, сонымен бірге фармацевтикалық өнімдердің қауіпсіздігі мен тиімділігін де қамтамасыз етеді. Қазақстан Республикасы Денсаулық сақтау вице-министрі фармацевтикалық индустрияның маңыздылығын атап өтіп, мемлекет тарапынан бұл бағыттағы қолдаулар мен ынталандырулар жалғаса беретінін жеткізді. Ежи Старак жаңа брендтің таныстырылымы Polpharma-ның даму стратегиясы мен сапаға, инновацияға және тұтынушыға жауапкершілігін көрсететінін айтты.

Сонымен бірге, Polpharma SANTO жобасы Шымкент қаласының экономикалық дамуына үлкен үлес қосатын болады. Бұл – жаңа жұмыс орындарының ашылуы, фармацевтикалық салада жоғары білікті мамандарды даярлау және ғылыми-зерттеу жұмыстарын дамыту үшін тың мүмкіндік. Сондай-ақ, мекеме үздік деген 4 студентке 1 жылдық оқу сертификатын табыстады. Білім алушылар бұл сәтті көп күткендерін айтып, көздеріне жас алды. Жалпы алғанда, «Химфарм» АҚ-ның жаңа корпоративтік бренді – Polpharma SANTO фармацевтика саласында жаңаша серпіліс, сапа мен сенімділіктің символы ғана емес, сонымен бірге еліміздің денсаулық сақтау жүйесін нығайтудағы маңызды әрі стратегиялық бастама.