«ҰЛПАН» ШЫҒАРМАСЫ ЖАҢА ФОРМАТТА САХНАЛАНДЫ

Ж.Шанин театрының 95 жылдығына арналған мерекенің үшінші күні Ғ.Мүсірепов атындағы Қазақ мемлекеттік академиялық балалар мен жасөспірімдер театрының «Ұлпан» комедиясымен жалғасты. «Ұлпан» шығармасы қазақ халқының отырықшылыққа үйреніп, жаңа мәдениет деңгейіне көтерілуін көрсететін асыл мұра. «Ұлпан» — махаббат, адалдық, ерлік пен даналық. Ұлпанның тағдыры арқылы жазушы қазақ халқының сол дәуірдегі өмірін тереңнен суреттеп, шынайы тарихи және рухани құндылықтарды оқырманға жеткізеді. Қыз бейнесі арқылы бекзат әйел болмысын ғана емес, қайсар рухты қазақ халқының жүріп өткен жолын көрсетеді. 27 жылдан кейін жаңаша форматта сахналанған шығарма театр төлқұжатына айналуда. Шығармадағы кейіпкерлердің образы автордың суреттеуімен шектеліп қалмаған. Ұлпанға жаңа қырынан жан бітірген қойылымның қоюшы режиссері Мәскеудегі Вахтангов театрының режиссері Гүлназ Балпеисова. Көршілес елден арнайы шақыртылған маманның ерекше көзқарасына алғашында актерлер қарсы да болған. Басты рөлді сомдаған Толқын Нұрбекованың айтуынша, көрермен көзайымына айналған шығарманы тың форматта сахналау 2 айға жуық уақытты алған. 3,5 сағатқа созылған спектакльде көрермен залы лық толы болды. Қала тұрғындарының театр өнеріне деген қызығушылықтарының арта түсуін, залға сыймай сахна сыртынан тамашалаған халық санының көптігінен байқауға болады.
Айта кетейік, Орталық Азия елдері театрларының IX халықаралық фестивалі үшінші мегаполисте 6-11 қараша аралағында жалғасады. Бұл Ж.Шанин атындағы Шымкент қалалық академиялық қазақ драма театрының 95 жылдығына орай өткізілуде.