Шаһарымызда Республика күні қарсаңында «Көк тудың желбірегені» атты байқаудың жеңімпаздары марапатталды. Патриоттар форумы аясында өткен бұл шараға 60 адам қатысып, мамыр айынан бері әлеуметтік желіде мемлекеттік рәміздер кеңінен насихатталды. Аталмыш патриоттық байқау отаншылдық сезімді дәріптеуге бағытталған. Шымкент қаласының әкімдігі ұйымдастырған форумға зиялы қауым өкілдері, ерікті жастар мен қала тұрғындары қатысты. Көрме орталығында өткен іс-шара еліміздің Мемлекеттік Әнұрынымен басталып, мемлекеттік рәміздеріміз ұлықталды. Еліміздің егемендігі жөніндегі Декларация қабылданған 25 қазан – Қазақстан Республикасының тәуелсіздігінің бастауына айналған күн. Мемлекет басшысы Қасым-Жомарт Кемелұлының бастамасымен қайта жаңғырып, ұлттық мәртебеге ие болған бұл мереке мемлекеттің тұтастығы мен халқымыздың ынтымақ-бірлігін бекемдеуде, жас ұрпақты патриоттық рухқа тәрбиелеуде ерекше мәнге ие. Рәміздер күнінде басталып, Республика күнінің қарсаңында қортындыланғалы отырған «Көк Тудың желбірегені» патриоттар форумы да осы мақсатпен керемет байланыс тауып отыр, – деді Сәрсен Абайұлы. Іс-шара барысында Тәуелсіздік құндылықтары, мемлекеттік рәміздерді насихаттау арқылы отансүйгіштік, патриоттық сезімдерді тәрбиелеу, мемлекеттік рәміздерге деген терең құрметті қалыптастыру мақсатында Шымкент қаласы әкімдігінің қолдауымен ұйымдастырылған «Үздік пост», «Үздік ролик», «Үздік іс-шара» байқауының жеңімпаздары марапатталды. Республика күні қарсаңында ұйымдастырылған форумда Шымкент опера және балет театры мен «Шымкент концерт» ұйымының әншілері өнерін ортаға салды.
Жалпықалалық патриоттық байқау отаншылдық сезімді дәріптеуге бағытталды. Қатысушылар 4 ай бойы мемлекеттік рәміздер туралы жазба жариялап, қоғамдық шаралар ұйымдастырды. Бейнероликтер әзірлеп, интернетте контент ұсынды. Байқауға 60 адам қатысты. Олардың арасында оқушылар мен мұғалімдер, мәдениет саласының өкілдері мен журналистер болды. Бұл байқаудың жақсы жағы өте көп. Әсіресе әлеуметтік желіде контенттің дұрысталуына, сапалы болуына үлесін қосты. Осылайша, «Үздік жазба», «Үздік бейнеролик» және «Үздік іс-шара» аталымының жеңімпаздары мен жүлдегерлері марапатталып, бағалы сыйлықтарға ие болды. «Алдағы уақытта байқау республикалық деңгейде өтуі мүмкін», — дейді ұйымдастырушылар.
