Әуесқой бокс: Бокстан Таиландтың Бангкок қаласында ұйымдастырылған соңғы лицензиялық турнирде Қазақстан құрамасының үш боксшысы Париж Олимпиадасының жолдамасын жеңіп алды. Ерлер құрамасынан – Мұхаммедсабыр Базарбайұлы (63,5 кг), қыздардан Назым Қызайбай (50 кг) мен Валентина Хальзова (75 кг) лицензияға қол жеткізді.
Триатлон: Ұлттық құрама спортшысы Екатерина Шабалина триатлоннан Париж Олимпиадасының жолдамасын иеленді. Халықаралық федерация Азия құрлығында қалған жалғыз квотаға Екатерина Шабалинаның ие болғанын ресми растады.
Садақ ату: Дәстүрлі садақ атудан Қазақстан ұлттық құрамасының спортшысы Айкөркем Батихан Түркияның Ыстанбұл қаласында өткен Fetih Kupası («Жеңіс кубогы») турнирінде жеңімпаз атанды.
Көркем жүзу: Канаданың Маркем қаласында өткен көркем жүзуден Әлем кубогінің үшінші кезеңінде Қазақстан құрамасы 2 алтын, 1 күміс, 2 қола медаль олжалап, жалпыкомандалық есепте 1-орынға ие болды.
Таэквондо: Оңтүстік Кореяның Мунгеонг қаласында басталған әскери қайраткерлер (CISM) арасындағы таэквондодан 27-ші әлем чемпионатында Қазақстан спортшылары 1 алтын, 3 күміс медаль жеңіп алды.
Спорттық гимнастика: Словенияның Копер қаласында өтіп жатқан спорттық гимнастикадан Әлем кубогының Challenge Cup турнирінде отандасымыз Дияс Тойшыбек күміс жүлдеге ие болды. Ол ат снарядындағы финалда 14.150 ұпай жинады.
Волейбол: Қазақстан әйелдер құрамасы Филиппин астанасы Манилада өткен волейболдан Challenge Cup турнирінің күміс жүлдегері атанды. Финалда жерлестеріміз Вьетнам құрамасынан үш партияда 0-3 (20-25, 22-25, 22-25) есебімен жеңіліп қалды.
Теннис: Қазақстандық теннисші Григорий Ломакин жұптық сында Тунистің Монастир қаласындағы ITF турнирінде топ жарды. Ресейлік Илья Симакинмен жұп құрап өнер көрсеткен жерлесіміз финалда португалиялықтар – Педро Араухо мен Хосе-Луис Маркесті 6:1, 7:5 есебімен ұтты.
Гір көтеру: Қазақстандық спортшылар Тайбэй қаласында өткен гір тасын көтеруден Азия чемпионатында 34 алтын, 25 күміс және 4 қола медаль иеленіп, жалпыкомандалық есепте екінші орыннан көрінді.
ҚР Туризм және спорт министрлігінің баспасөз қызметі
