Шымкентте «Жасыл белдеу» аумағынан өрт шықты. Егіс алқабында жұмыс атқарып жүрген трактордан ұшқан ұшқынның салдарынан қураған шөп өртеніп Солтүстік Шығыстан Батысқа қарай секундына 10,15 метр жылдамдықта жер жаханды жайпап өтті. Тілсіз жау Шымкент Ташкент жолының бойында орналасқан жанар жағармай бекетіне, орман алқаптарына, бидай алқаптарына қауіп төндірді. ТЖД-нің жеке құрамы мен жұмылдырылған күштер өртті дер кезінде ауыздықтандырды. Жарақат алғандар жоқ. Бұл Шымкент қаласы ТЖД «республикалық өрт» командалық штаптық оқу жаттығу жиыны болатын.
Күннің аптап ыстығында орманды аумақтарға төнер қауіп өте жоғары. Оның алдын алу мен жеке құрамның тәжірибесін арттыру мақсатында Шымкентте жыл сайын дайындық жұмыстары жүргізіледі. Өрт тактикалық оқу-жаттығу жиынына Шымкент қаласы ТЖД және «Жасыл белдеу» КММ, азаматтық қорғау қызметінің күштері мен құрылымдары жұмылдырылды.
Шартты өрт орнында өрт сөндіру штабы құрылып, Квадракоптер көмегімен тілсіз жаудың алқымын, жылдамдығын анықтау жұмыстары жүргізілді. Бірлескен іс қимылдардың нәтижесінде өрттің одан әрі таралуына жол берілмеді.
Айта кетейік, дала-орман өрті орын алған жағдайда жұмылдырылатын күштер мен техникалар толық тексерістен өтті. Оқу жаттығу жиынына 79 бірлік техника және 297 адам жұмылдырылды.
