ӘСКЕРДЕГІ АШЫҚ ӘҢГІМЕ

7 мамыр – Отан қорғаушылар күні мен Жеңіс күні қарсаңында әуе шабуылына қарсы қорғаныс бригадасында «Сарбазға прокурорлық кеңес» акциясы өтті. Тағылымды кездесуде сарбаздар жауынгерлік даярлығын көрсетіп, ардагерлермен ашық пікір алмасты. Кездесуге Шымкент қаласы бойынша «Қарулы күштер ардагерлері» кеңесінің төрағасы, Шымкент гарнизоны әскери прокуратурасының аға прокуроры, және сарбаздар қатысты.

Іс-шара әскери бөлімнің саптық алаңында басталды. Онда мерзімді әскери қызметін өтеп жүрген сарбаздар қоян-қолтық ұрыс тәсілдерін қарумен және қарусыз орындап, жауынгерлік даярлық деңгейін көрсетті. Сонымен қатар қонақтарға әскери қызметшілердің заманауи киім үлгілері таныстырылып, сарбаздардың ас мәзірі мен жауынгерлік кезекшілікті ұйымдастыру тәртібі көрсетілді.

Кездесу барысында құқық қорғау органдарының өкілдері мен ардагерлер сарбаздармен ашық сұхбат өткізіп, құқықтық мәдениетті қалыптастыру, әскери тәртіпті сақтау және патриоттық құндылықтарды нығайту мәселелерін талқылады. Жиын барысында сарбаздар ардагерге түрлі сауалдарын жолдады. Жалпы әскери бөлімде өткен іс-шара соңында әскери прокуратура өкілі әскери тәртіпті сақтап, үлгілі қызмет атқарған бірқатар сарбазға Бас әскери прокурор, әділет генерал-майоры Дастан Секеновтың атынан алғыс хаттар табыс етті.