Бір жыл бұрын қайта жаңғырып, ұлттық мереке ретінде тойлана бастаған Республика күні қарсаңында мегаполисте тәрбиелік, патриоттық маңызы бар шаралар өтеді. Тәуелсіздік бастау алған тарихи күге орай жалпы 20 іс-шара ұйымдастырылуда.
Ұлт үшін маңызды датаға былтыр ел Президенті ерекше мәртебе берді. 25 қазан Тәуелсіздік бастау алған тарихи күн. Еліміздің барлық аймағы зор құрметпен атап өтетін мереке үшінші мегаполисте кең көлемде атап өтіледі. Бұл жөнінде ішкі саясат және жастар істері жөніндегі басқармасы басшысының м.а. Мөлдір Кеуенова баспасөз брифингінде баяндады.
Аталған іс-шаралар жоспарына сәйкес, бүгінгі таңда қала аумағында мерекелік безендіру жұмыстары жүруде. Спикердің айтуынша, жалпы жоспар аясында мерекелік және патриоттық-тәрбиелік маңызы бар іс-шаралар өткізілетін болады. Олар: «Ұрпаққа аманат» жобасы аясында «Патриотизм дауысы» атты патриоттық әндер челленджі, «Дебаттық қозғалыс» жобасы аясында «Мен өз елімнің азаматымын!» атты қалалық дебат турнирі, жастар арасында зияткерлік конкурстары.
Жалпы мерекеге орай қаланың 5 ауданында арнайы концерт іс-шаралар, көрмелер, ауыл шаруашылық жәрмеңкелері ұйымдастырылмақ. Сондай-ақ Шымкент қалалық мәдениет, тілдерді дамыту және архивтер басқармасына қарасты өнер мекемелерінде Кітапханашы күніне орай және 25 қазан Республика күні аясында жалпы 20 іс-шара ұйымдастырылып, өткізілетін болады.