ТҮРКІСТАНДА АЛҒАШҚЫ ӨНІМ ЖИНАЛДЫ

 Түркістан облысы аумағында ерте пісетін көкөністер басқа өңірлерге қарағанда 2 ай бұрын жиналады. Оған дәлел ретінде көктем шыға салысымен Түркістандық шаруалар алғашқы өнімдерін жинап, бүгін жәрмеңкеге қойды.

 Республиканың түкпір-түкпірінен келген кәсіп иелері алғашқы жиын терімге жоғары бағасын беріп, таңдай қақты. ҚР ауыл шаруашылығы министрі және облыс әкімі Өмірзақ Шөкеев шаруалармен кездесіп, өнімдердің балғын әрі сапалы, бағасы да қолжетімді екендігін тілге тиек етті.

 Түркістан облысында жыл сайын 845 мың гектар жерге ауыл шаруашылық дақылдары егіледі. Ал ағымдағы жылы облыста ерте пісетін 197,8 мың тонна қырыққабат өнімі облыс қажеттілігін 12 есеге артық қамтамасыз етуге қауқарлы. Жалпы, Түркістан облысы климаттық орналасу, жұмыс күші тұрғысында ауыл шаруашылығын дамытуда Қазақстандағы ең қолайлы өңір болып табылады.

Мемлекет басшысының 3 жыл ішінде азық-түлік қауіпсіздігін түбегейлі шешу жөнінде берген тапсырмасын орындауға облыс шеңберінде өте үлкен мүмкіндік бар.Сонымен қатар, облыс басшысының тапсырмасына сәйкес қолға алынған «Бір алқаптан 2-3 өнім» алу жобасы бүгінде жемісті нәтиже беруде. Бұл шаруалардың шығынын азайтып, табысын арттыруға үлкен мүмкіндік дейді облыстық ауыл шаруашылығы басқармасының басшысы Нұрбек Бадырақов.

Айғақ-ақпарат