Шахматтан Қазақстанның алғашқы гроссмейстері Нахбаева Гүлісхан Сайфулинқызы Шымкент қаласы Білім басқармасы басшысының орынбасары болып тағайындалды. Бұл туралы ол өзінің инстаграм желісіндегі парақшасында жариялап, қуанышын оқырмандарымен бөлісті, — деп хабарлайды aigak.kz тілшісі.
«Өткен жылы «Президенттік Жастар кадрлық резерві» жобасына қатысып, менің өмірімде дұрыс қадам жасағандығыма көзім жетті. Ұлттық комиссияның 2019 жылғы 25 желтоқсандағы шешімі бойынша 300 жас маман-басқарушылар қатарына қабылдандым. Бізді өзгерту агенттері деп атады. Жүйелі реформалардың уақыты келді.
Құрметті достар, бүгінгі күннен бастап өзімнің кәсіби қызметімді Шымкент қаласы Білім басқармасы басшысының орынбасары лауазымында бастадым. Техникалық және кәсіптік білім беру және балалардың құқықтарын қорғау (қорғаншылық және қамқоршылық) мәселелеріне жетекшілік ететін боламын. Әр жылдары мектепте және университетте шахмат, ағылшын тілінен сабақ бердім. Өзімнің жинақталған тәжірибемді жас талантты шахматшыларға беру үшін шахмат мектебін құрдым. Білім және ғылым министрлігі Мектепке дейінгі және орта білім беру Комитетінің мониторинг, талдау және өңірлік ынтымақтастық басқармасының басшысы лауазымында болып жұмыс істедім.
Дегенмен, менің қоғамға пайдалы болуға және еліміздің дамуына өзімнің аналитикалық және зияткерлік қабіліттілігімді дұрыс бағытта пайдалануға тырысамын. Алдымызда бірқатар жүйелі міндеттер қойылды, оларды шешу бойынша Сіздермен жедел түрде бөлісетін боламыз. Ел Президенті Қасым- Жомарт Кемелұлы атап өткендей, біздің ортақ мақсатымыз – азаматтардың сауалдарына жедел және тиімді жауап беретін «Халық үніне құлақ асатын мемлекет» тұжырымдамасын іске асыру. Осы мақсатта, құрметті азаматтар, білім басқармасының қызметкерлері Сіздер үшін ашық.
Құрметпен, Гүлісхан Сайфулинқызы» — делінген ақпаратта.
Гүлісхан Сайфулинқызы 1991 жылы 20 маусымда Шымкент қаласында дүниеге келген. Қазақ қыздары арасынан шыққан тұңғыш гроссмейстер (2012 жыл). Қазақстанның жеті дүркін чемпионы. Жасөспірімдер арасында Азияның екі дүркін жеңімпазы (16 және 18 жас). Азияның күміс жүлдегері (20 жасқа дейін). Әйелдер арасында Азия чемпионатының күміс жүлдегері. Ерлер арасында халықаралық дәрежедегі спорт шебері атанған тұңғыш қазақ қызы (2013 жыл)
