Шымкент қаласында карантин талаптарын сақтамаған нысандар ережені ескермесе, есіктері қайта жабылады. Қаладағы сақтық шараларына салғырт қараған бірнеше дәмхана, мейрамханалар ашылмай жатып жұмысын тоқтатуға мәжбүр. Төтенше жағдайдан кейін, келушілерді қабылдай бастаған тамақтану орындары қазіргі таңда жіті тексерілуде. Оған себеп, санитарлық талаптардың сақталмауы болып отыр.
Қоғамдық тамақтану орындары әлі де санитарлық талаптарды орындауға асығар емес. Оған Әл-Фараби ауданының әкімі Ғабит Мәуленқұлов кезекті рейд барысында көз жеткізіп, кәсіпкерлерлерге шара қолданды. Мобильді топ қаладағы Некрасов көшесінің бойындағы қоғамдық тамақтану орнын аралап, санитарлық талаптардың сақталмағанын көріп, осымен 2 асхананың есігін жапқан болатын. Бүгінгі тексеру барысында да 1 дүңгіршек жабылды. Оған себеп, саудагерлердің қолғабы мен медициналық бетпердені тақпауы. Мұнымен қоса, тазалық та сақталмаған, Ал қалғандарына әзірше ескертулер берілуде. Әкімдіктегілер жауапқа тартылғандардың әрекеті өзгелерге сабақ болса екен дейді.
