Әкім туған жерін түлетпек

Шардара ауданы 2021 жылы толық газбен қамтылады деген жоспар бар. Қазір халқының 17 пайызы ғана көгілдір отынға қол жеткізген. Жыл соңына дейін бұл көрсеткіш 50 пайызға дейін көтерілмек. Бұл туралы осыдан алты ай бұрын Шардараға әкім болған Қайрат Жолдыбайұлы мәлімдеді. Жергілікті тұрғындармен кездесіп, есеп беріп жүрген басшыны аймақтағы жамағат тірлігіне епті, қиын сұрақтардың шешімін табатын іскер деп жүр.

Шағалалы Шардара. Балығы тайдай тулаған, бақасы қойдай шулаған, шағаласы қалықтап көк аспанда ойнаған Шардара су қоймасы еліміздің мақтанышы. Көлдің жағасында демалып, алтын құмда ем алып, балығының дәмін татқан адам аймаққа қайта аңсары ауып тұрады. Ішкі туризмді дамытуға нағыз лайықты жер. Түстігінде Самарқанд, теріскейінде Түркістан, шығысында Ташкент, батысында Бұқара шаһарлары жатқан Шардара ауданы өткен жылы 55 жылдығын атап өтті. Жарты ғасырдан астам тарихы бар мекенді 2019 жылдың шілде айынан бастап Қайрат Жолдыбайұлы басқарып отыр. Экономист-менеджер мамандығын игерген азамат дәл осы Шардараның тумасы. Сондықтан туған жерді түлету тапсырылған болатын. Әлеуметтік мәселені шешу әрқашан бірінші орында тұруы тиіс. Бірақ, әкімнің сөзіне сүйенер болсақ әуелі қоғамның қауіпсіздігін қамтамасыз етіп, қылмысты төмендету үшін күш жұмсапты.

2019 жылы Шардараның бюджетіне 3 миллионнан астам қаржы түсіп, жоспар артығымен орындалған көрінеді. Жылына 30 000 тонна мақта өңдейтін зауыт іске қосылып, 250 адам жұмыспен қамтылған.  Әкімнің өткен жылдың тірліктеріне берген есептік баяндамасына құлақ түрсек көптеген салада ілгерілеу бар. Еліміздің астанасында еңбек жолын бастап, Шардара ауданы әкімінің орынбасары, Ордабасы ауданында бес ай әкім болған Қайрат Жолдыбайұлына бұл жолы үлкен жауапкершілік жүктелген. Көзкөрген ауылдастарының жағдайын жақсартып, әлеуметтік мәселесін шешу. Әкім Шардара ауданындағы бүкіл елді мекенге есептік кездесуге дейін бір емес бірнеше рет барып, тұрғындармен ашық сөйлесіп алған. Барды бар деп, жоқты жоқ деген басшыға Шардаралықтар риза болып отыр. Қауысбек Тұрысбеков ауылдық округінде болған есептік кездесуде жиналған жұрттың берген жақсы бағасын тыңдап тату ағайынның бірлігіне, көңіліне риза болдық.

Тұрғынның бірі бес күндік фәнидің жалған екенін еске түсіріп, Ұлы ақын Абайдың өлеңін оқығаннан кейін Қауысбек Тұрысбеков ауылдық округінің халқы тоқтай қойды. Киелі сөздің мағынасын ұғатын ауылдағы ағайынның осы жерде көңілі дархан даладай екеніне тағы да көз жеткіздік. Иә, қазіргі қоғамда кісінің жақсылығын асырып, жамандығын жасыру кез-келгеннің қолынан келмейтін іс. Жаушықұм ауылдық округінде өткен есептік кездесу кезінде де Қайрат Жолдыбайұлы көрпесіне қарай көсіліп, жоспарында көп мәселені шешу бар екенін айтты.

17 жылдан бері тәжірибе жинаған азамат кадрлық өзгеріс жасауға асықпапты. Тек Президенттің тапсырмасы аясында жастарды қолдау үшін қызметке тартып, қоғамдық өмірге белсене араласуына мүмкіндік берген. Шарадараны көркейтем деген әкімді тұрғындар арқасынан қағып, халыққа жақын қарапайым мінезі үшін мақтауын асырып, болам деген басшының белін буды.

Болар елдің баласы бірін-бірі батыр дейді. Қашанда татулығы жарасқан, ауызбірлігі мықты елдің тілегі мен асыл армандары орындалып, бейғам өмір сүретіні ежелден белгілі. Жаушықұмда өткен есептік кездесу кезінде тыныс-тіршілігі бір ағайын арасындағы сыйластыққа куә болдық. Елдің батасын алып, рухтанып шыққан Қайрат Жолдыбайды есептік кездесу өткен мектептің қарсы алдында күтіп алып, сұхбат алдық.

80 мыңдай тұрғыны бар Шарадара ауданында 10 ауылдық округ, бір қала бар. 1958 жылы Кеңес Одағының әр түкпірінен келген мыңдаған комсомолдар түлеткен шағалалы мекен бүгінде балығымен шартарапқа аты шықты. Әлеуметтік мәселені шешуді жоспарлап, биыл өзгеше жаңалық әкелуді көздеп отырған Қайрат Жолдыбайұлы Түркістан облысының әкімі Шөкеев бастаған «Қамқорлық» жобасын жалғастырды. Әлеуметтік аз қамтылған отбасылардың шаңырағына барып, күнкөріс жағдайымен танысты. Ағынды өмірдің сынағына төзген анаға құрмет көрсетіп, қолдау білдіріп кетті.