Қазығұртта әлемдік брендтегі кеспе өнімдерін дайындайтын зауыт ашылды

Қазығұрт ауданында жылдам дайындалатын кеспе өнімдерін шығаратын бірегей алпауыт кəсіпорын іске қосылды, деп хабарлайды «Айғақ-Ақпарат» тілшісі. Аталмыш зауытты əлемдік деңгейдегі «GG Foods Central Asia» компаниясы іске қосып отыр.

Жылына 5 мың тоннаға дейін дайын кеспе өнімдерінің бірнеше түрін шығарады деп жоспарланып отырған кəсіпорынның ашылу салтанатына ҚР Премьер-министрі Асқар Мамин арнайы келді. «Қазығұрт» индустриялдық аймағында орналасқан «GG Foods Central Asia» компаниясының өндіріс орны қазірдің өзінде жергілікті 100 адамды тұрақты жұмыспен қамтып отыр. Ал, кəсіпорын толық қуатқа көшкенде мұнда жалпы саны 300 жұмыс орны ашылатын болады.

Жобаның жалпы құны 5,7 млрд. теңгені құрайды. Осы орайда Үкімет басшысы Асқар Ұзақбайұлы зауыт жұмысымен етене танысып, кəсіпорынды аралап көрді. Айта кету керек, «GG Foods» бүгінде бизнестің бірнеше бағытымен айналысса, алпауыт компанияның əлемнің 30-ға тарта елінде зауыттары жұмыс жасайды. Өз кезегінде аталмыш компанияның Президенті, Непалдың бірінші миллиардері Бинод Чаудхари инвесторларға жасалған қолдау үшін ҚР Премьер-министріне шынайы алғысын білдірді. Ендігі жерде Қазығұрт ауданында шығарылатын əлемдік брендтің жылдам даярланатын кеспе өнімдері елімізбен қатар Ресей, Қырғызстан, Өзбекстан, Тəжікстан сынды алыс жақын шет елдерге экспортқа шығарылатын болады.