Түркістан облыстық Қоғамдық кеңесінің отырысы өтті

Түркістан облысы Қоғамдық Кеңесі отырысының күн тәртібінде тоғыз мәселе қаралды. Алғашқысы «Түркістан облыстық мәслихатының 2018 жылғы 12 желтоқсанындағы 33/347-VI «2019-2021 жылдарға арналған облыстық бюджет туралы» шешіміне өзгеріс еңгізу туралы» Түркістан облысының мәслихаты шешімінің жобасы ұсынды. Бұл жөнінде Түркістан облысының стратегия және экономикалық даму басқармасының басшысы Арман Абдуллаев мәлімдеді.
Күн тәртібіндегі келесі мәселе «2020-2022 жылдарға арналған облыстық бюджет туралы» Түркістан облыстық мәслихаты шешімінің жобалары да қаралды. Кеңес мүшелерінің назарына 2019 жылғы облыс бюджетіндегі кірістер,салықтық түсімдер мен игерілген қаржы есебі ұсынылды. Жұмсалған қаржының басым бөлігі құрылыс жұмыстарына бөлінген.
Сондай-ақ, көгілдір отын мен ауыз су мәселесі көтеріліп, жауапты мамандармен кездесіп, нақты нәтижеге қол жеткізу жоспарланды. Өңір басшысы Өмірзақ Шөкеевтің тапсырмасы бойынша 72 нысанға газ жүргізу бекітілген.Өзекті мәселе жыл соңына дейін оң шешімін табатыны айтылды. Үшінші мәселе — «Түркістан облысы бойынша әлеуметтік маңызы бар қатынастардың тізбесін айқындау туралы» мәслихат шешімінің жобасы талқыланды. Баяндамашы Түркістан облысының жолаушылар көлігі және автомобиль жолдары басқармасының басшысы Р. Ибрагимов мәлімдеді. Бүгінгі таңда қолданыста-108 бағыт, жаңадан 21 бағыт ашылып жатыр. Кеңес назарына субсидиялау мәселесі ұсынылды.

Бүгінгі кеңесте қаралған маңызды мәселенің бірі — Кентау қаласының көшелері және шағын аудандарға атау мен қайта атау беру қаралды. Ұлы далаға ие болар ұлылар есімін ұлықтап, ұлттық болмысты таныту мәселесі жайын кеңес мүшелері талқыға салды. Бұл жөнінде Түркістан облысының мәдениет басқармасы басшысының орынбасары Ә. Қойлыбаев мәлімдеді. Күн тәртібіндегі алтыншы мәселе- ауыл- аудандарға ауыз су жүргізу. Орталықтандырылмаған таза ауыз суды жабдықтау кезінде жер үсті және жер асты су обьектілерінен су алу бойынша қаржы қарастыруға ұсыныс білдірілді. «Спорттың басым түрлерінің өңірлік тізбесін бекіту туралы» Түркістан облысы әкімдігінің қаулы жобасы да бүгінгі қоғамдық кеңесте қарастырылды. Облыстық дене шынықтыру және спорт басқармасының басшысының орынбасары Данияр Исабаевқа тараптардан сауалдар жолданып, ұлттық спорт түрлеріне баса назар аударып, нәтижелі жұмыс жасау тапсырылды. Күш атасы жатқан жерде қазақтың туын көтерер дарынды балуандарды баптап, бәйгеге қосу шегелеп тапсырылды.
Қоғамдық кеңес назарына ұсынылған соңғы мәселе -ағымдағы жылдары оқу жылына техникалық және кәсіптік, орта білімнен кейінгі білімі бар кадрларды даярлауға арналған мемлекеттік білім беру. Білім ордаларындағы мамандықтар бойынша лицензия алу, білікті кадрларды дайындау жайында сауалдар жолданып, ұсыныстар қаралды.