Ерлан Айтаханов — Шымкент қаласының әкімі

Қазақстан Республикасының Президенті Қасым-Жомарт Тоқаевтың Жарлығымен Шымкент қаласының әкімі болып Ерлан Айтаханов тағайындалды.

Ерлан Қуанышұлы бұған дейін Отырар ауданының әкімі қызметін атқарып келген болатын.

Бүгін Шымкент қаласының әкімдігінде кезектен тыс өткізілген мәслихат сессиясында Қазақстан Республикасының Президенті Әкімшілігінің басшысы Қырымбек Көшербаев мегаполистің жаңа әкімін ұжымға таныстырды.

Ерлан Айтаханов 1971 жылы 10 желтоқсанда Алғабас ауданында дүниеге келген. Үйленген, екі баласы бар. 1994 жылы ММУ-ді тәмамдаған. 2001 жылы Қазақ мемлекеттік заң академиясының түлегі болды. Еңбек жолын 1994 жылы Alem Bank Kazakhstan-да бастаған. Бір жылдан соң «Газойл» фирмасының қаржы директоры болды, содан кейін, ҚТЖ-да жұмыс істеді. 1998 жылы «Жолаушылар тасымалы» компаниясы директорының орынбасары болып тағайындалды.

2002 жылы Айтаханов Көлік және коммуникация министрлігінде департаментті басқарды. Осыдан кейін қазіргі Шымкент әкімі Табиғи монополияларды реттеу және бәсекелестікті қорғау агенттігінде еңбек етті. 2009 жылы ол бұрынғы Оңтүстік Қазақстан облысы әкімінің орынбасары болып еңбек етсе, Президент Әкімшілігінің инспекторы болып та қызмет атқарды. 2014-2016 жылдар аралығында Ерлан Қуанышұлы Оңтүстік облысы әкімінің орынбасары лауазымында абыройлы еңбек етті. 2016 жылдың қаңтар айынан бастап Отырар ауданының әкімі қызметін атқарып келген болатын.

Еліміздегі үшінші мегаполистің тізгінін ұстаған Ерлан Айтахановтың жұмысы жемісті болсын дейміз!

«Айғақ-Ақпарат»