Үшінші мегаполиске келген жұмыс тобын ҚР Премьер-Министрінің орынбасары Гүлшара Әбдіқалықова бастап келді. Жұмыс тобы қалалық орыс драма театры ғимаратында қала тұрғындарымен кездесу өткізді.
Шымкент қаласының әкімі Ғ.Әбдірахымов ашып, жүргізген жиынға ҚР Еңбек және халықты әлеуметтік қорғау министрі Б.Сапарбаев, Білім және ғылым министрі К.Шәмшидинова, Денсаулық сақтау вице министрі Л.Ақтаева және көп балалы аналар, аз қамтылған отбасылар мен мүмкіндігі шектеулі азаматтар, бюджеттік ұйымдардың қызметкерлері — барлығы 500-ден астам адам қатысты.
ҚР Премьер-Министрінің орынбасары Гүлшара Әбдіқалықова өз сөзінде Елбасының «Әлеуметтік қамсыздандыру» жаңа әлеуметтік шараларының іске асырылу барысы туралы хабардар етті.
Одан кейін сөз алған ҚР Еңбек және халықты әлеуметтік қорғау министрі Б.Сапарбаев ведомствоның халықтың табысын арттыру және аз қамтамасыз етілген отбасыларды қолдау бойынша қабылдаған шаралар туралы айтты. Атаулы əлеуметтік көмек көрсетудің жаңа тəртібі негізінен күн көрісі төмен оның ішінде көп балалы отбасыларды қолдауға бағытталған. Сонымен бірге атаулы əлеуметтік көмек тағайындаған кезде отбасының жиынтық табысынан көп балалы отбасыларға жəне «Күміс алқа», «Алтын алқа» мен марапатталған аналарға, мемлекеттік жəрдемақылар, сондай-ақ балаларға арналған мүгедектігі бойынша жəрдемақылар, степендия алып тасталады. Сонымен қатар аз қамтылған отбасылардың балаларына 18 жасқа дейін оқыған жағдайда 23 жасқа дейін ай сайын 20789 тенге көмек төленетін болады. Сонымен бірге кездесуде өзге де министрлік өкілдері өз салалары бойынша əлеуметтік көмек шараларына тоқталып тұрғандар сауалына жауап берді.
Жаңа дағдылар мен құзыреттілікті талап ететін заманауи жағдайларда сапалы білім беру мәселесі ерекше маңызға ие. Аталған мәселе бойынша және білім беру саласындағы реформалар бойынша ҚР Білім және ғылым министрі К. Шәмшидинова сөз сөйледі.
Кездесу барысында орталық мемлекеттік органдардың ресми тұлғалары қоғамды толғандыратын мәселелер бойынша толық жауаптар мен түсініктемелер берді. Кездесуді қорытындылай келе, ҚР Премьер-Министрінің орынбасары Г. Әбдіқалықова 11 көпбалалы отбасына мемлекеттік тұрғын үй бағдарламасы аясында салынған жаңа пәтерлердің кілттерін тапсырды. 
Елбасының «Нұр Отан» партиясының кезекті 18-ші съезіде халықтың тұрмыс сапасын жақсартуға бағытталған «Әлеуметтік қамқорлық» бастамасы аясында халықтың әлсіз топтарын қолдау, баспана беру, бюджеттік салада табысы аз қызметкерлердің жалақысын 30 пайызға көтеру, жергілікті жолдардың жағдайын жақсарту, инженерлік инфрақұрылым мәселелерін шешу бағытында жұмыстар жүргізілуде.
