— Түркістан облысының әкімі Жансейіт Түймебаев Парламент Мәжілісінің депутаттарымен кездесті. Іс-сапармен келген мәжілісмендердің қатарында Қуаныш Сұлтанов, Жамбыл Ахметбеков, Құдайберген Ержан және Кеңес Абсатиров бар. Кездесу барысында Түркістанның әлеуметтік-экономикалық дамуы сөз болды. Өңір басшысы аймақта атқарылып жатқан шаруаларды таныстыра келе, қолға алынған құрылыс жұмыстарына тоқталды. «Түркістан қаласының келешектегі бас жоспарына сәйкес, қала құрылысы мен сәулеті үш бағытта жүргізіледі. «Тарихи аймақ» — 88,7 гектар, «Рухани-мәдени орталық» аймағы — 98 гектар, «Әкімшілік-іскерлік орталық» аймағы — 700 гектарды құрайды. Осыған орай, құрылыс нысандарына қажетті жерлерді қайтару жұмыстары заң негізінде жүргізілуде. Әкімшілік іскерлік орталықта бірнеше нысанның құрылысы қатар жүреді. Яғни онда облыстық әкімдік, басқармалар мен департаменттер және конгресс-орталық тұрғызылады»-деді Жансейіт Қансейітұлы. Түркістан бүкіл түркі әлемінің жүрегіне жақын екендігін айтқан халық қалаулылары, Елбасы тапсырмасы бойынша киелі шаһардағы қарқынды құрылыс жұмыстарына сәттілік тіледі. Астанадан арнайы іссапармен келген мәжіліс депутаттары, өңірдегі сайлаушыларымен де кездесіп, көпшіліктің көкейдегі пікірлерін тыңдамақ.
— Қазығұрт ауданының әкімі Төлеген Телғараев 2018 жылдың жұмысын түйіндеді. 13 ауылдық округі бар аймақты толық аралаған әкім есептік кездесудің қорытындысын ауданның орталығында өткізді. Қаржы мамандығын игерген әкім өткен жылы бюджеттің кірісін көбейту үшін күш жұмсап, миллиардтарды еселепті. Халық алдындағы баяндамасын осындай мәліметтерден бастаған Қазығұрттың басшысына жергілікті тұрғындар жақсы баға беріп жатты.
— «Айғақ» телеарнасында тағы да жаңа жоба. «Өңірлердің өсуі» – Қызылорда, Жамбыл және Түркістан облыстарының және Шымкент қаласының әлеуметтік-экономикалық дамуын насихаттай отырып, әрбір қазақстандықтың еліміздегі өзгерістер үдерістеріне ат салысуды көздейді. Дайындалған сараптамалық материал «Айғақ» телеарнасының aigak.kz сайты, фейсбук, инстаграмм парақшаларында жарияланатын болады. «Орталық атқарушы органдар басшыларының, әкімдердің, ұлттық жоғары оқу орындары ректорларының халыққа есеп беру кездесулерін өткізу туралы» Қазақстан Республикасы Президентінің 2016 жылғы 5 ақпандағы №190 Жарлығына сәйкес, Қызылорда қаласы әкімінің 2018 жылы атқарған жұмыстарын жариялауға бүгін арна журналистері жолға шықты. 6 ақпанға белгіленген қорытынды мәжілістен арнайы репортажды алдағы уақытта көретін боласыздар.
— Түркістан облыстық Экономика және бюджеттік жоспарлау басқармасының басшысы Сәбитов Арман облыстың жалпы экономикалық көрсеткіші бойынша есеп берді. Мәселен, облыстағы аргоөнеркәсіп саласында атқарылған жұмыстар 2017 жылмен салыстырғанда жоғары нәтижені көрсетіп отыр. 2017 жылы облыста өндірілген өнім мөлшері 482,4 млрд теңгені құраса, 2018 жылы 542,8 млрд теңгеге жеткен.
— Мемлекеттік қызметке қабылдау талаптары өзгерді. ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Түркістан облысы бойынша Департамент басшысы Ғалым Тұрсынбаев брифинг өткізді. Онда мемлекеттік қызмет саласына енгізілген жаңалықтар айтылды. «Б» корпусы лауазымына үміткер тұлғалар үшін жеке қасиеттерін бағалауға арналған тестілеуде жауаптардың растық деңгейі 50%-дан кем болмауы тиіс деп отыр. Егер көрсеткіш нәтижесі төмен болса үміткер жеке қасиеттерін бағалаудың растық деңгейінен өтпеді деп танылады. Алайда бір ай уақыттан кем емес мерзімнен соң қайта өтуге мүмкіндік алады. Бірінші ақпаннан бастап, департамент қызметшілері өңірлердегі тестілеу орталығында тестілеу әкімшісі ретіндегі қызметін тоқтатты. Бұл қызметті «Мемлекеттік қызметтің персоналын басқару ұлттық орталығы» АҚ-ның тестілеу операторы атқаратын болады. Сондай-ақ, осы уақыттан бастап «Б» корпусының бос лауазымына үміткерлер конкурс жариялаған мемлекеттік органға заңнаманы білу туралы сертификат пен жеке қасиеттерін бағалау қорытындысын өткізбейді.
— Үшінші мегаполисте «Нұр Отан» партиясы Абай аудандық филиалының кезектен тыс 36 конференциясы өтті. Бұл келелі жиында күн тәртібіндегі үш түрлі мәселе қаралып, тиісті жұмыстарды жүргізу туралы қаулы қабылданды. Конференцияға Парламент Мәжілісінің депутаты Байділда Жылқышиев, «Нұр Отан» партиясы Шымкент қалалық филиалы төрағасының бірінші орынбасары Бахадыр Нарымбетов қатысып, еліміздегі жетекші партияның алдағы уақытта атқарылуы тиіс жұмыстар ретімен бөлісті.
— Қазақстан Республикасының V жазғы спартакиадасының ашылу салтанаты өтті. Бұл сайыс 4 жыл сайын ұйымдастырылып тұратындығы мәлім. Еліміздің әр өңірінен келген спортшылар грек-рим, еркін және әйелдер күрестерінен өз бақтарын сынайтын болады. Шымкент қаласында бұл спартакиада ақпанның 4 –і мен 10-ы аралығында өткізіледі. Барлығы 17 команда, 14 облыстан 3 қаладан, жалпы саны 700- ге тарта үздік спортшылар қатысып отыр. Кең көлемде өткізілетін сайыстың спорт сүйер қауымға берер мүмкіндігі орасан зор. Ашылу салтанатына қатысқан Шымкент қаласының әкімі Ғабидолла Әбдірахымов спортшыларды құттықтап, барлығына сәттілік тіледі.
«Айғақ-ақпарат».
