Қырымбек Көшербаев: «Жеткен жетістігіміздің барлығы — ауызбіршіліктің нәтижесі»

Алдағы уақытта Арал мен Байқоңырдың экологиясы туралы Заңға тиісті өзгерістер енгізу бойынша жұмыстар жүргізілетін болады. Елбасы Сыр елінің барлық көкейтесті проблемаларына қамқорлық танытып отырғандығын айтқан Қызылорда облысының әкімі Қырымбек Көшербаев мемлекет басшысына өз алғысын білдірді.

Биыл 30 қаңтарда Қазақстан Президентінің қатысуымен өткен кеңейтілген отырыста тапсырылған тапсырмалардың барлығы орындауда өзінің лайықты орын алатындығын атап өтті.

Қызылорда қаласының әкімі Нұрлыбек Мәшбекұлы Нәлібаевтың 2018 жылы атқарған жұмыстарына оң бағасын берді.

Шағын және орта бизнесті дамытуда — Қызылорда облысы еліміз бойынша бірінші орынға шыққан. Бұл —  тұрақты жұмыс орындарының көптеп ашылғандығының дәлелі. Былтыр Қырымбек Елеуұлының бастамасымен 264 елдімекеннің барлығын аралап, жұмыссыздардың статистикасы түзілген. Бір ғана Қызылорда облысында      32 млрд. қаражат кәсіпкерлікті дамытуға жұмсалып отыр. Нәтижесінде, жергілікті бюджетті нығайту арқылы — салықтық база ұлғайып келеді. Есесіне, қаладағы қоғамдық саяси тұрақтылық та сақталатын болады.

Қызылорда әкімінің шағын және орта кәсіпкерлікті өзі тікелей сараптап отыратындығын білдік. Наубайхана бар ма, шаштараз бар ма, монша бар ма? Мұның барлығы кәсіпкерлікті дамытуға негізделгендігін атап берген Қырымбек Елеуұлы  электрмен жабдықтауда екі пробемалық мәселе бар екендігін ашып айтты. Олар: Жалағаш ауданы мен Қызылорда қаласы. Бұл бағыттағы мәселені шешу үшін тиісті сала басшысына арнайы тапсырма берді.

Облыс орталығында жалпы  766 көше бар, тас төселгені 35 болса, 322-і қара жол. Қырымбек Көшербаев ендігі күшті кіші жолдарға салу керектігін назарға алды. Қала көшелерін өзі аралап шыққан. Өзге саладағы шығындарды қысқартып, осы мәселені шешіп беру керектігін алға тартты. Алдымен, мектепке барар жолдарды жөндеу қолға алынады. Бұл мәселенің қоғамдық кеңесте тағы бір қаралуы тапсырылды.

«Жол құрылысын жүргізуге 3,3 млрд. теңге бөлуге мүмкіндігім бар. Құрметті жерлестер! Қырқына шыдадық, қырық біріне шыдайық. Барлығы да өз шешімін табады. Тұрғын үй бойынша тиісті тапсырмалар берілді. Сол жақ жағалаудағы қала құрылысын қайта қалпына келтіруіміз керек. Қызылорда жасару, жаңару жолына кірісті. Ардақты ағайын, келер ұрпаққа әсем қаланы сыйлап кетейік» — деп сөзін қорытындылаған облыс басшысы жеткен жетістіктің барлығы — ауызбіршіліктің нәтижесі екендігін атап берді.

Айта кетейік, кәсіпкерліктің дамуына үлес қосқан қалалар мен өңірлер «Хан Тәңірі» сыйлығына ұсынылып келеді. Рейтинг бизнес-ахуалды жақсарту жөніндегі реформаларды тәжірибеде анағұрлым белсенді түрде жүзеге асыратын және қолданатын өңірлер мен қалалардың позициясын анықтайтын толыққанды тетік болады. 2018 жылы бұл сыйлықты Елбасының қолынан Қызылорда облысының әкімі Қырымбек Елеуұлы алған болатын.

Жиын барысында сөз алған Қызылорда қаласы, Сабалақ саяжайының тұрғыны Г.Байымбетова ауыз су мәселесінен бөлек, табиғи отын, жол секілді инфрақұрылымның қашан шешілетіндігін сұрады. Өз кезегінде қала әкімі Нұрлыбек Мәшбекұлы соңғы уақытта қала аумағының 11 мың гектардан 20582 га ұлғаюйына байланысты жаңадан қосылған елдімекендер мен саяжайлардың инфрақұрылым мәселелерін шешу — өзекті болып отырғандығын жасырмады. Дегенмен, жоспарлы жұмыстардың арқасында және облыс әкімінің тапсырмаларына сәйкес, көп ұзамай бұл мәселелер кезең-кезеңімен шешілетіндігін жеткізді.

«Айғақ-ақпарат»