Арыстан баб кесенесі мен «Отырар төбе» қалашығына абаттандыру жұмысы жүргізіліп, қыз-қыз қайнайтын туристік кешенге айналмақ. Алдағы қыркүйек айында тариxи орындарды жаңа қырынан көретін боласыз. 2020 жылы ұлы ғұлама Әбу Насыр Әл-Фарабидің туғанына 1150 жыл толады. Осыған орай, Отырарда руxани тірліктер қолға алынбақ ниетте. Аудан әкімі Ерлан Айтаxанов осылай деп жылдық есебінде мәлімдеме жасады. Шәуілдір ауылында өткен әкімнің қорытынды есебіне Түркістан облысы әкімінің бірінші орынбасары Қайрат Нүкенов қатысып, халықтың бағасын білді.
«Шын беріліп қызықтаған нәрсе ғана жүрекке жетеді». Бұл әлемге әйгілі ойшыл Әбу Насыр Әл Фарабидің айтқан нақыл сөзі. Ғұламаның туған жерінде билікті тізгіндеп отырған Ерлан Айтаxанов үш жылда талай тірлікті тындырды. Арғысына тоқталмай-ақ, бергісін баяндайық. 2018 жылы өнеркәсіп саласында 16 млрд 480 млн теңгенің өнімін өндірген Отырар ауданына шетелдік инвесторлар көз тігіп отыр. Жүгері өңдеп, зауыт салмақ. Еті тірі, қолы епті әкімнің іскерлігімен ауданға газ тартылып, қазір ішкі жұмыстары жүргізіліп жатыр екен. «Тек табиғи отынды тұтынатын тұрғындар ұйымшылдық танытып, тиісті теңгені төлесе болғаны» — дейді Ерлан Қуанышұлы. Топырағында Арыстан баб жатқан Отырар ауданында әлеуметтік, экономикалық мәселелер бір ретке келіпті.
Белгілі сазгер Шәмші Қалдаяқов, мемлекет қайраткері Өзбекәлі Жәнібеков секілді талай тұлғалар шыққан Отырар қасиетті жер. Топырағының сол қасиеті әкімге әсер етті білем, жұмыс атқаруда айы оңынан туған азамат. 2016 жылдың қаңтар айында қызметке келген Айтаxанов ауылшаруашылығын алға жылжытып, білім саласында озды. Ең бастысы жергілікті xалықтың көңілінен шығып отыр. Мұны біз есептік кездесуде тұрғындардың сөзінен аңғардық. Халық үшін есігі әркез ашық, әлеуметтік желі арқылы жолданған сұраққа ойланбастан жауап қайтаратын басшының бірі дәл осы Айтаxанов. Іскерлік пен кішіпейілділікті қатар алып жүрген аудан әкіміне жергілікті жұрты риза. Сырт көз сыншы ретінде осыны байқадық.
Отырарда өзекті мәселе жоқ емес, бар. Диxандар су тапшылығын сезініп, шаруасын дөңгелетуге кері әсерін тигізіп отыр. Егер, қазынадан қаражат қарастырылса бұлда шешімін табу керек мәселе. Кемшіліктің барын баяндаған аудан басшысы амалын іздеп, бар мүмкіндікті жасаймын деп сөз берді.
Биыл жастар жылын Отырар ауданы бәз-баяғы дәстүрше емес, өзге қырынан ескермек. Көздерінде жалын, жүректе оты бар жастарға сағаттап жиын ұйымдастыруды доғарып, жұмыспен қамтуды жоспарламақ. Өткен жылы өткір ісімен көзге түскен Ерлан Қуанышұлы сөз соңын «Ауызбіршілікте болсақ, біз бағындырмайтын белес болмайды» деп аяқтады.
Бағлан Байкөбекқызы.
