Ағымдағы жылдың 28 желтоқсаны күні Жоғарғы Соттың Төрағасы Жақып Асанов Қарағанды облыстық сотының ұжымымен кездесті, деп хабарлайды ҚР Жоғарғы сотының баспасөз қызметі.
Іс-шараға облыс әкімі Ерлан Қошанов, облыс прокуроры Марат Сексембаев, ҰҚК мен Ішкі істер департаменттерінің бастықтары Кендебай Адамбеков пен Мергенбай Жаппаров, судьялар, сондай-ақ басқа да құқық қорғау және мемлекеттік органдардың басшылары қатысты.
Ж.Асанов осыған дейін Соттардың қызметін қамтамасыз ету департаментінің басшысы қызметін атқарған Нұрсерік Шәріповтің облыстық соттың жаңа төрағасы болып тағайындалғанын хабарлады. Жоғарғы Сот Төрағасы оның Президент Әкімшілігінде қызмет атқарғанын, судьялық 20 жылдық жұмыс өтілін, соның ішінде Оңтүстік Қазақстан облыстық сотының төрағасы болғанын атап өтті.
«Нұрсерік Кәрімұлымен бірге бір жыл қоян-қолтық жұмыс істедік. Нақты талап қоя білетін білікті басшы ретінде ол соттардың күнделікті жұмысын сауатты үйлестіре білді. Оның белсенді ұстанымының, әрбір іске тыңғылықты қарайтын қасиетінің арқасында «Сот төрелігінің жеті түйіні» бағдарламасы іске асырылды. Аталған жайттарды ескере отырып, оны осы лауазымға тағайындау туралы шешім қабылданды», — деді Ж.Асанов. Ол Н.Шәріповтің Мемлекет басшысы артқан сенім үдесінен шығып, жаңа қызметте жетістіктерге жетуіне тілектестік білдірді.
Нұрсерік Кәрімұлы Шәріпов 1965 жылы 13 қазанда Павлодар облысының Ертіс қаласында туған. С.М.Киров атындағы Қазақ мемлекеттік университетінің заң факультетін (1990) заңгер мамандығы бойынша; М.Қ. Дулати атындағы Тараз мемлекеттік университетінің экономика факультетін (2006) экономика бакалавры дәрежесімен бітірген.
1988 жылдан — С.М. Киров атындағы Қазақ мемлекеттік университетінің заң факультетінде комсомол котитетінің хатшысы. 1990 жылдан — С.М. Киров атындағы Қазақ мемлекеттік университетінің әкімшілік құқық кафедрасының ассистенті. 1992 жылдан — ҚР Президенті Аппаратының жене Министрлер кабинетінің азаматтық және рақымшылық жасау жөніндегі бөлімінің референті. 1995 жылдың наурыз айынан — Қазақстан Республикасының Президенті Аппаратында рақымшылық жасау бөлімінің аға референті. 1995 жылдың маусым айынан Алматы қаласы Фрунзе аудандық сотының судьясы. 199.. жылдан — Апматы қаласы Медеу аудандық сотының судьясы. 2007 жылдан — Алматы қаласының мамандандырылған ауданаралық әкімшілік сотының төрағасы. 2008 жылдан Маңғыстау облысының мамандандырылған ауданаралық экономикалық сотының төрағасы. 2010 жылдың ақпан айынан — Маңғыстау облыстық сотының апелляциялық сот алқасының төрағасы, 2012 жылдан 2017 жыл аралығында Оңтүстік Қазақстан облыстық сотының төрағасы, 2017 жылдан жаңа қызметке дейін Жоғарғы сот жанындағы соттардың қызметін қамтамасыз ету жөніндегі департамент басшысы қызметін абыроймен атқарды.
Естеріңізде болса, Нұрсерік Шәріпов 2012-2017 жылдары Оңтүстік Қазақстан облыстық сотының төрағасы қызметін атқарған тұста, облыстық сот ғимаратының алдына «Үш бидің» ескерткішін, ҰОС ардагерлеріне арнап «Даңқ тақтасын» ашып, ҰОС-ның ардагері, заңгер-жазушы Н.Төлендиевтің тұрған үйіне мемориалды тақта орнатуына мұрындық болды, оның есімін Шымкенттегі бір көшеге бергізгені және Шымкенттен Ордабасы тауына дейін «Билерге тағзым», одан кейін «Түркістанға тағзым» велошеруін ұйымдастырып, Түркістан қаласына барғаны, сондай-ақ судьялармен бірге қыс айында Қазығұрт тауына шығып ту тіккен болатын.
Нұрсерік Кәрімұлының жаңа қызметіне сәттілік тілейміз!
