— Түркістан облысымен төрт түлігі қоралас, жайлауы жағалас жатқан Жамбыл облысының орталығы Тараз қаласында ұлан асыр той. Қала тұрғындары мен қонақтарының игілігіне пайдалануға берілген 20 руханият нысаны көне шахардың келбетін ажарландыра түсті. Қоңыр күзде жасыл желекке оранған саябақтар келушілердің көңіліне үлкен қуаныш сыйлады. Ескерткіштер орнын тауып, жағалаулар жайқалып, суға 3 мыңдай балық жіберіліп, ағаш көшеттері отырғызылды.
— Қазақстан инженерлік-педагогикалық Халықтар Достығы универсиетінің негізін қалаушы, химия ғылымдарының докторы, профессор – Әбдімұса Қуатбеков дүниеден озды. Бар ғұмырын білім мен ізденіске арнаған азамат 1942 жылдың 4-маусымында дүниеге келген. Арыс ауданының тумасы. Ташкент мемлекеттік университетінде жоғарғы білім алып, еңбек жолын Шымкент қаласындағы жоғарғы оқу орнында оқытушы болып бастайды. Жамбыл, Қарағанды облыстарындағы университетте тәжірибе жинап, еңбек кітапшасын толықтырған. 2005 жылдан бастап Халықтар Достығы университетін қолға алып ректор, президент болып басшылық қызметті атқарды. Әбдімұса Қуатбеков ғұмыр жолында тек білімге ғана күш салған жоқ. Қайырымдылық пен қамқорлық жасау да оның өмірлік ұстанымы болды. Мәселен, өзі негізін қалаған оқу ордасында жыл сайын мүмкіндігі шектеулі жандар және жетім балалардың тегін білім алуына ықпал етті. Болдым, толдым деп аспаған азамат. Талай шәкіртті өмір бәйгесіне қосқан Әбдімұса Мұратұлының ғылымға қосар жаңалығы әлі алда еді. П.Капица атындағы халықаралық сыйлықтың иегері, білім беру ісінің Құрметті қызметкері 76 жасында бұл жалғанмен қоштасты. «Айғақ» телеарнасының ұжымы марқұмның отбасының қайғысына ортақтасып, көңіл айтады.
— Мектепте ақша жинау мен оқушылар арасында болатын сан түрлі заңбұзушылықтар – әлі күнге дейін күйіп тұрған мәселе. Білім ордасы баланың келешегіне жол сілтейтін маңызды мекеме болғандықтан, ондағы жағдай жақсы болуы керек. Осыған орай, Шымкент қаласындағы білім саласын бақылау департаменті дөңгелек үстелді қолға алып, қамқоршылық кеңесін құруға білек сыбана кірісті.
— 29 қазан — дүниежүзілік инсультке қарсы күрес күні. Осыған орай Облыстық клиникалық ауруханадағы невропатологтар ашық есік күнін өткізді. Науқан барысында мамандар адамдардың қан айналымы жүйесіндегі ауруды және оның асқынуын дер кезінде анықтауды мақсат еткен. Мекеме қызметкерлері ашық есік күнін Оңтүстік Қазақсатан медицина академиясының қызметкерлерімен бірге жүзеге асырды
—Сайрам ауданына қарасты Қарабұлақ елді мекенінде жаңа ем қабылдау орталығы пайдалануға берілді. «Ақ ниет» атауымен ашылған статционарлық орталық 50 адамға шақталған. Жексенбі күні лентасы қиылған емханаға халық қалаулыларыда арнайы ат басын бұрды. Ел игілігіне берілген ғимараттың құрылтайшысы жеке кәсіпкер Абдуғани Абдукаймов.
—Түлкібас ауданында білім ордаларының ішіндегі қасиетті қара шаңырағы саналатын Абай мектеп лицейінің құрылғанына биыл 80 жыл. Бүгінгі таңда білім деңгейі бойынша рейтингісі жоғары мектептердің көшін бастап тұрған білім ордасында талай азаматтар түлеп ұшқан. Және мектептің кәсіби өсуі өзге білім ошақтарына үлгі болып отыр.
—Америка Құрама Штатының ең үздік«Халықаралық медициналық тәжірибе алмасу» коммерциялық емес ұйымы Мегаполисте семинар өткізді. 22-26 қазан аралығында өткен маңызды шараға Шымкент қаласындағы балалар дәрігерлері, акушер-гинекологтар, терапевтер қатысқан. Шет елден келген мамандардың негізгі мақсаты — «Клиника дәрігерлері үшін медициналық генетика негіздері мен жетістіктері» тақырыбы аясында мастер-класс өткізіп, тәжірибесімен бөлісу. Сондай-ақ, күрделі жағдайдағы балаларды қабылдап, өз кеңестерін де берді. Сонымен қатар, « Созылмалы В және С вирусын диагностикалау және емдеу туралы білімдерді жоғарылату» тақырыбын да қамтып, аталмыш вирустың атын естіп үркіп қашатындай себеп жоқ екендігін айтты.
—Қараша айы жаңбырмен басталмақ. Қазгидромед синиоптиктерінің болжамынша алдағы 31 қазан мен 2 қараша күндері облысымызда ауа райы жауын-шашанды. Тіпті, арты қарға ұласады. Ауа температурасы түнде 1-ден 6 градусқа дейін, кей жерлерде 9 градусқа дейін төмендейтін болады. Ал, күндіз 2-ден 7 градусқа дейінгі аяз болады деп күтілуде. Осы аралықта облыстың кей аудандарында желдің ұйытқу қатері 15 пен 20 метр секундына дейін жетеді.
