«Боралдайдың бозторғайы» атанған халық ақыны Таймановтың туғанына 150 жыл! Өнегелі ғұмыры қатпарлы қиындықтан тұрса да, өмірдарияның қатты ағысына мойымай, жанына серік еткен домбырасымен ел жағалап, айтыскерлік өнерімен халық арасында танылған. Төле бидің төрінде туылған ол – Бәйдібек ауданының Боралдай жотасында мәңгілікке мекенін тапқан. Мерейлі тойды дүбірлете атап өткен Бәйдібек ауданының әкімдігі республикалық ақындар айтысын ұйымдастырып, жарыс жеңімпазына темір тұлпардың кілтін табыстады.
«Айғақ» телеарнасы Орынбай Таймановтың есімін ұлықтап, еңбегін жаңғыртуда көптеген жобаларды қолға алып келеді. Иә, Оңтүстік өңірінің халық ақыны атағына ие болған үш бірдей перзентінің ардақтысы. Тауқұдірет деп жыр алыбы Жамбыл Жабаевтың өзі құрмет тұтқан тұлғаның есімін бүгінгі ұрпағы қаншалықты біледі? Насихаттай алып жүрміз бе? Міне, Елбасы айтқан рухани жаңғырудың алғышарттары да осыдан басталады. Уытты сөздері, отты жырларымен замана ағымын сынап, жарқын болашақты көксеген жандардың бірі де – Орынбай ақын болатын. Айтысқа жиналған зиялы қауым өкілдері алдымен Боралдай өзенінің биігіндегі ескі қорымда мәңгілік мекенін тауып, қайта жаңарған Тайманов кесенесінде рухына Құран бағыштап, есімін еске алды.
Айта кетуіміз керек, бүгінгі шарада Орынбай ақынның 150 жылдық мерейтойына арнап шығарған арнайы төсбелгіні аудан әкімдігі бүгінгі мерейтойға атсалысқан азаматтарға табыс етті. Әсіресе, біраз жылдар жетімнің күйін кешіп тұрған Таймановтың кесенесін жөндеуге өз қаражаттарын жұмсаған ел азаматтары халықтың алғысына ие болды бұл күні. Ал, айтыс қорытындысы бойынша жүзден жүйрік шыққан Бәйдібектің түлегі Біржан Байтуов темір тұлпарды тізгіндеді. Бірінші орын Ринат Зайытовта. Екінші орынды Қажымұхан Абзалов қанжығаласа, үшінші орынды Рүстем Қайыртай иеленді.
Салтанат ТОЙБОЛОВА