Геннадий Головкиннің (37-0, 33 КО) мексикалық Сауль «Канело» Альвареспен (49-1-1, 34 КО) жекпе-жегі елімізде тікелей эфирде көрсетіледі, деп хабарлайды Baq.kz ақпарат агенттігі Vesti.kz-ке сілтеме жасап.
Олардың жекпе-жегі АҚШ-тың Лас-Вегас қаласындағы 20 мың орындық T-Mobile аренасында 16 қыркүйек күні өтетін бокс кешінің басты оқиғасы болмақ. Жекпе-жек Астана уақытымен 17 қыркүйек, яғни жексенбінің таңында өтеді. Головкин – Альварес бокс кешін трансляциялауға құқық алған Qazaqstan мен QazSport (бұрынғы «Қазақстан» және KazSport) телеарналары тікелей эфирде көрсетеді.
АҚШ-та Головкин-Альварес жекпе-жегі HBO арнасында ақылы трансляциялар жүйесі (PPV) бойынша таратылады.
Айта кетейік, 35 жастағы Головкин алдағы жекпе-жегінде WBC, WBA (Super), IBF және IBO титулдарын қорғайды. 27 жастағы Альварес WBC басшылығымен жанжалдасып қалуына байланысты ұйымның белбеуіне үміткер бола алмайды.
Дереккөз: Baq.kz