Оңтүстік Қазақстан облысы Мақтаарал ауданына Павлодар облысы Ертіс ауданының әкімі Серік Батырғұжинов жұмыс сапарымен келді. Ол Жетісай қаласы әкімі аппаратының мәжіліс залында солтүстік өңірлерге көшіп барып, жұмыс істеуге ниетті мақтаралдықтармен жүздесіп, мемлекет тарапынан көрсетілетін көмектер туралы әңгімелеп берді.
Ертіс ауданы Павлодар қаласынан 170 шақырым қашықтықта орналасқан. Жерінің жалпы көлемі 1019,3 мың гектарды құрайды. Ал, 915 мың гектар ауыл шаруашылығы мақсатында пайдаланылады. Ауданда 268 шаруа қожалығы мен 17 серіктестік ауыл шаруашылығы өндірісімен айналысады. Алайда аталған қожалықтарда дәл қазіргі уақытта механизатор, аспазшы, жүк көлігін жүргізуші, малшы, токарші, моторшы, агроном, мал дәрігері, электрик сияқты мамандықтарды қажет ететін 40-қа жуық жұмыс орындары бар.
«Ауданымызда бүгінгі таңда математика, ағылшын тілі, тарих, орыс тілі, психолог, химия, информатика, бастауыш сынып, физика, технология, қазақ тілі, география, денешынықтыру, сызу, музыка пәндерінен 50-ге жуық мұғалім қажет. Бұдан бөлек, медицина саласына қатысты 10-ға жуық мамандарға ваканция бар. Жоғары білімі бар, жұмыс таба алмай жүрген білікті мамандарды өңірімізді өркендетуге шақырамын»,- деді Ертіс ауданының әкімі Серік Батырғұжинов.
Бүгінде Ертіс ауданы аймағында 27 мектеп, 5 балабақша және 1 колледж жұмыс істеп тұр. Аудан әкімінің айтуынша, көшіп келгендерді міндетті түрде жұмысқа орналастырып, тұрғын үймен қамтамасыз етеді. Ауыл шаруашылығымен айналысамын деушілерге жер беріліп, тіпті несие арқылы лизингке техникалар алып беруге де әзір.
ОҚО әкімінің баспасөз қызметі
