Бұл өңірде саналы ғұмырын кен байыту ісіне арнап, абыройға бөленіп отырған азаматтар аз емес. Солардың бірі, әрі бірегейі — КСРО Мемлекеттік сыйлығының лауреаты, Еңбек Қызыл Ту, Октябрь революциясы ордені, Егемен елдің «Отан» орденінің иегері, Кентау қаласының және Оңтүстік Қазақстан облысының Құрметті азаматы Сақ Мәуленқұлұлы Мәуленқұлов. Бүгінде кенші ардагер 90 жасқа толды. Металлургтер күніне орай Сақ Мәуленқұлұлының мерейтойын кентаулықтар думандатып атап өтуде. Олай болуының өзіндік себебі бар. Сақ Мәуленқұлұлы басшылық жасаған жылдары қалада көптеген игі істер жүзеге асты. Құрылыс қарқынды жүріп, әлеуметтік нысандар ел игілігне пайдалануға берілді. Атап айтар болсақ, Ш.Қалдаяқов атындағы мәдениет сарайы, «Жансая» шипажайы, мектептер мен балабақшалар комбинат есебінен бой көтерді. Осылайша білікті маман, кәсіби кенші, білгір басшы «Ащысайтүстіметалл» комбинатын 18 жыл бойы басқарып, абыройлы қызмет атқарады.
Мерекелік шара қаладағы Абай даңғылынан 2015 жылы ашылған «Кеншілер» аллеясындағы ескерткіштерге гүл шоқтарын қоюмен басталды. Содан кейін қаладағы Ш.Қалдаяқов атындағы мәдениет сарайының фоесінде кеншілерге арналған көрме ұйымдастырылды. Сақ Мәуленқұлұлының 90 жылдық мерейтойына арналған салтанатты жиынға еліміздің түкпір түкпірінен келген әріптес, замандастар достарының қарасы қалың.
Алғашқы сөз кезегін алған облыс әкімінің бірінші орынбасары Дархан Сатыбалды елбасы Н.Ә.Назарбаевтың құттықтау хатын тапсырып, кеш иесін айтулы күнімен құттықтады. Сонымен қатар облыс әкімдігінің аппарат басшысы Е.Әлімқұлов облыс әкімі Б.Атамқұловтың арнайы құттықтау хатын тапсырды. Тірі тарих тұлғасы Сақ Мәуленқұлұлын құттықтаған хаттар бұнымен шектелген жоқ. Ақтөбе облысының әкімі Б.Сапарбаев, Қызылорда облысының әкімі Қ.Көшербаевтың, ОҚО «Нұр Отан» партиясы төрағасының бірінші орынбасары атынан, сонымен қатар Ресей елінде қызмет жасап жүрген бұрынғы бір топ қызметтес достарының құттықтау хаттары табысталды.
Қала әкімі Ә.Мақұлбаев «ардақты Сақ Мәуленқұлұлы сізді 90 жылдық мерейтойыңызбен шын жүректен құттықтаймын. Сіз бар ғұмырыңызды кен өндіру ісіне, осындай әсем қаланың қалыптасу жолына арнадыңыз. Жас кезіңізден еңбекке араласып, тылда жүріп тынымсыз еңбек еттіңіз.» деп жасаған еңбегіне атап өтті. Жиында Сақ Мәуленқұлұлына «Кенші даңқ» орденіні табысталып, «Даңқ» орденінің толық кавалері атанды.
Салтанатты жиында кенші ардагер жайында деректі бейнефильм көрсетіліп, жасаған еңбектері жайында паш етілді.
Өткен ғасырдың дәл ортасында бой көтерген кеншілер қаласының атақ-даңқы кен өндіру ісімен тығыз байланысты. Кентаулық аға ұрпақтың әлемді таңдандырған және ешбір ел жаңарта алмаған шапшаң бұрғылау жөніндегі рекорды тарих бетінде алтын әріппен жазылып қалды. Бұл сол уақыттағы кенші-металлургтердің төгілген тері, қолтаңбасы ретінде кейінгі буынға өнеге болып қала береді.
Сондықтан да Кентау – қиындықтан тайсалмайтын, еңбектен жиренбейтін нағыз еңбекқор, отансүйгіш, ел мен жердің абырой-беделі үшін тау қопарып, тас тескен елжанды еңбек майталмандарының қалашығы, әлеуеті мықты «кадрлар ұстаханасы» аталды.
Кентау қаласы әкімдігінің баспасөз орталығы
