Қала аумағында құқық бұзушылықтың алдын алу мәселесі Шымкент қаласы әкімдігінде қала әкімі Ғабидолла Әбдірахымовтың төрағалығымен өткен әкімдік мәжілісінде жан-жақты талқыланды. Күн тәртібіне сәйкес, қалалық жергілікті полиция қызметінің қоғамдық тәртіпті сақтаудағы жұмыстары сараланды. Жиында алдымен Шымкент қалалық ішкі істер басқармасының бастығы Арман Бейсенбаев 2016 жылдың 5 ай қорытындысы бойынша баяндама жасады. Оның айтуынша өткен жылдың осы кезеңімен салыстырғанда қылмыс деңгейі 9601-ден 10 777-ге, яғни 12, 2 пайызға жоғарылап отыр. 2015 жылмен салыстырғанда 1176 қылмысқа артты. Оның 53,1 пайызы бөтеннің мүлкін ұрлау қылмысы, оның 17 пайызы ашылды. Ал алаяқтық 16,6 пайызды құрады. Оның 58 пайызы ашылды. Бүгінгі таңда алаяқтық қылмыстарын тергеу бойынша Шымкент ҚІІБ-да жедел тергеу тобы құрылған. Оның құрамына 15 тергеуші, 3 анықтаушы, 8 жедел уәкіл кіреді. Оларға тікелей алаяқтық қылмыстарын ашуға бағытталған міндеттер жүктелген, — деді Шымкент қалалық ішкі істер басқармасының бастығы Арман Бейсенбаев.
Бұдан бөлек, бес айда 413 жол көлік-оқиғасы тіркеліп, 30 адам өмірмен қош айтысқан. 500-ден астам адам түрлі жарақатпен ауруханаға түскен. Басқарма бастығы жол көлік апаттары айналма жолдарда жиі болатынын, алдын алу үшін түрлі шаралар қолға алынып жатқандығын жеткізді. Одан кейін жергілікті полиция бөлімінің басшысы Данияр Мейірхан мен қала әкімі аппаратының құқықтық бөлімінің басшысы Нұралы Қырғызәлиевтың баяндамалары тыңдалды. Жергілікті полиция бөлімінің басшысы Данияр Мейірхан тұрғындарды жол қозғалысы ережесін бұзбауға, ұсақ заң бұзушылыққа нөлдік төзімділік танытуға шақырды. Айтуынша, қылмыстың алдын алуға арналған WhatsApp желісіндегі телефон нөмірге түрлі тақырыптағы 353 хабарлама түсіп, оның 175-і бойынша тәртіп бұзушыларға қатысты шара көрілген.
Мәжіліс соңында қылмыстық іс-әрекеттердің алдын алу бойынша ұсыныстар айтылды.
– Қылмыстың алдын алу, полиция жұмысын жандандыру – бәріміздің ортақ мақсатымыз. Бірақ қылмыспен күресудегі нәтиже көңіл көншітпейді. Сондықтан жаңа жүйеге көшіп, жаңа технология енгізуіміз керек шығар, — деген қала әкімі Ғ. Әбдірахымов сала мамандарына тиісті тапсырмалар жүктеді.
Шымкент қаласы әкімдігінің баспасөз қызметі
