Бүгінгі бейбіт күннің азат ұландары соғыс жылдарының майдангерлерінің рухына әрдайым тағзым жасау парыз. Отан үшін от кешіп, қан майданда кеудесін оққа тосқан қаншама жас жарық дүниенің шапағатын сезінбей кетті. Есесіне ертеңгі ұрпағына елін, жерін аманаттаған жауынгерлердің тілегі халқына бақыт сыйлады. Майдан даласына Оңтүстік Қазақстаннан аттанған 140 мыңнан аса азаматтың небәрі 35 мыңы ғана туыстарымен қауышты. Соғыс салған сансыз жара ешқашан ұмытылмайды. Ерлік даңқы да жыл өткен сайын жаңғыра бермек. Жыл сайын ортамызда жүрген ардагерлерге құрмет көрсету дәстүрлі дағдыға айналған. Шымкент қаласында 141 майдангер есепте тұр. 7 мыңнан астам тыл еңбеккері бар. Қала әкімдігі ұйымдастырған салтанатты жиынның куәсі болған соғыс ардагерлері Жеңістің 71 жылдық мерекесінде тағы бір марқайып қалды.
Шымкент қалалық мәслихатының депутаты, «Мұнай Инвестмен Груп» АҚ басқарма төрағасы Ғани Ташқараев үнемі қайырымдылық шараларының басы қасында жүреді. Сайлау округіне қарасты мөлтекауданда тұратын ҰОС ардагерлерінің шаңырағы арнайы атбасын бұрған халық қалаулысы, сыр бөлісіп, пікір алмасты. Қариялардың бір сәтке болсын көңілін аулап, әңгіме шертіскен жандар, ыстық ықыласқа бөленді. Иван Коваленко 1926 жылы туылған. Соғыс аяқталар тұста, әскер қатарына алынған азамат Жеңіске өзіндік үлесін қосты. Қуанышты күннің белгісі естілгенде жүректердегі ерекше тебіреністі айтып жеткізу мүмкін емес дейді. Алексей Андреев – іс-шаралардың белсенді қатысушысы. Бастан өткерген оқиғаларын сұраған жандарға айтып беруге дайын. Өйткені, жастар өқткенін бес саусақтай білуі тиіс дейді. Соғыстың зардабын көз көргендер арқылы естіп білмесе, оқудың жөні бір бөлек. Ал, Олег Бирюковтың жасы 94-те. Төсек тартып қалса да, күнделікті жаңалықтан қол үзбейді. Газет-журналдарды ақтарып, теледидар тыңдап отырады. Сталинград түбінде ұрысқа араласқан жас сарбаз Украина мен Қырым жеріне дейін барған. «Қызыл жұлдыз» орденінің иегері.
Кезекті марапаттауда Абай аудандық сотының ұжымы да белсенділік танытты. Аумаққа қарасты ардагерлердің шаңырағына арнайы барып, сый-сияпатын үлестіріп жүрген судьялар үлкеннің өнегесі кішіге үлгі деп отыр. 1941 жылы соғысқа аттанып, негізгі шайқасты Сталинград түбінде жүргізген жауынгердің бірі Қалдыбек Байжарқынов еді. Қатарластарының басым көпшілігі ұрыс даласында о дүниеге аттанған. Украина мен Белоруссия, Польша шекараларында жауға қарсы тұрып, шегінбеген қайсар жан елге аман-есен оралады. Ерлігі 4 жыл бойы соғыстың дәл ортасында болып, бүгінгі күннің бақытына кенеліп отырған Қалдыбек ақсақалдың ендігі тілегі тек бірлік, береке. Ынтымақ бар жерде жұмыс көш ілгері жүреді. Сондықтан да елімді ауызбіршіліктен айырмасын дейді. 69 жыл отандасқан Шымыр әжемізді биыл жер қойнына тапсырыпты. Жүректегі сағынышы сыздатады әрине. 9 перзенті жеткізіп, немере-шөберелердің ортасында қуанышқа кенеліп отыр.
Шымкент қалалық қорғаныс істері жөніндегі басқармасы да қала бойынша ардагерлерді министрлік атынан келген сияпаттарды табыстап, құттықтап жатыр. Жасы үлкеннің жағдайын сұрау — ізеттіліктің белгісі. Балаң көңілін аулау — көпті көргеннің жемісі. Арапбай Елеуов 1924 жылы қазіргі Ордабасы ауданы, Батыр ата ауылында дүниеге келген. 19 жасында соғысқа аттанған ол жарақат алып ауылына қайтарылады. Туған жеріне келген соң шаруашылықпен айналысып, мал басын көбейтуге атсалысқан. 12 перзентінен немере, шөбере, неменені қатар сүйіп отыр. Бүгінде Шымкент қаласының Жаңааталап мөлтекауданында тұрады.
Салтанат Тойболова
