Әдеттегідей БАҚ өкілдерінің кездесуінде баяндама жасайтын ауданның қатарын бейсенбіде Түркістан қаласы толықтырды. Атқарылған жұмыстар мен ауқымды тірліктердің ретін саралаған қала әкімі Әліпбек Өсербаев 1 сағат бойына қағазсыз есеп берді. Иә, қолында ешқандай құжаты жоқ әкім журналистерге әрбір мәліметтерді, әсіресе, сандық көрсеткіштерді еш бүкпесіз айтып шықты. Бұл әкімдік қызметте отырғанына 2 жылға жуықтаған Әліпбек мырзаның нағыз іскер азамат екендігін көрсетсе керек. Тікелей Елбасы тапсырмасына сәйкес, Облыс әкімінің бастамасымен Түркістан қаласында қолға алынған игі істердің қатары көп.
Түркістан қаласында өткен жылы жалпы өңірлік өнім көлемі 81 млрд теңгені құраған. Қуантатыны рухани астананың туристері жыл санап артып келеді. 3 жыл бұрын келушілер қатары 618 мың болса, 2015 жылы бұл көрсеткіш 1 млн 25 мың адамға жеткен. Биыл да нақты межені орындау жоспарланып отыр. Ол үшін «Көне Түркістан» концепциясын жүзеге асыру мақсаты бар. 3 кезеңнен тұратын жоба рухани астананың бар мүмкіндік әлемге паш етпек.
Әрбір салаға бөлініп отырған қаржының нәтижесінде кем-кетіктер түзеліп, әлеуметтік тұрмыс жақсарып келеді. Соңғы жылдары аймақтағы инвестиция көлемі де артқан. Мәселен, 4 жұлдызды қонақ үйдің құрылысы жүргізіліп жатса, түйе сүтін өңдейтін алып өндіріс орнын қытайлықтар болашақта жүзеге асырмақ ниетте екен. Арнайы келіссөздер жүргізіліп, екіжақты келісімдер жасалған. Болашақта жылына 1 млрд-тан астам сүт өндіріп, өнімді Батыс Еуропа елдеріне экспорттауға ниетті екен. Әрине, бұл тірліктердің орындалуына алдағы уақыт куә. Ал, венгриялықтар болса, күн сәулесінен энергия алатын жобаларын жасамақ. Нәтижесінде жергілікті халықты жұмыспен қамтып қана қоймай, қайта мамандандыруға да мүмкіндік туады.
Айта, кетейік, Түркістан қаласының бас жоспарына сәйкес, негізгі әкімшілік ғимарат Шымкент бағытының бойында орналасады. Ол үшін арнайы жер бөлініп қойған. Сонымен қатар, көпқабатты тұрғын үйлер үшін аумағы 100 гектарды құрайтын орын да белгіленіп қойған. Қазіргі таңда 6 тұрғын үйдің құрылысы жүргізіліп жатса, Қазақстанның ипотекалық компаниясы арқылы 9 қабатты 2 үй мен 5 қабатты 2 үйдің құрылысы шешімін тапқан. Сонда, бірінші кезекте үй кезегінде тұрған 4 мыңға жуық азаматтың баспана мәселесі шешілмек.
Мамандығы экономист әкімнің 2016 жылы қолға алынған жұмыстарының ауқымы кең. Транзиттік-логистиканың бірден бір орталығы Түркістан десек, шағын және орта бизнесті дамытуда да қарқынды жобалар қолға алынуда. Сондай-ақ, аймақта өсіру көлемі кенжелеп қалған мақта шаруашылығын да қайта жандандырмақ.
Салтанат Тойболова
