Бейсенбі күні облыс әкімдігінде Жергілікті полиция қызметінің жұмысын ұйымдастыру мәселелері бойынша мәжіліс өтті. Онда өңір басшысы мен құқық қорғау органдарының өкілдері қатысты. Еске салайық, өткен жылы ҚР Үкіметімен еліміздің өңірлерінде жергілікті билік органдары мен халыққа есеп беретін жергілікті полиция қызметінің (ЖПҚ) мекемелерін құру туралы қаулы бекітілген болатын. Жиын барысында ОҚО ЖПҚ бастығы Б.Абылаев қаулының қабылданғаннан соң, жаңа құрылымның жұмысын ұйымдастыру аясында қажетті шаралардың қабылданғанын жеткізді.
«Негізгі қызметтерге үміткерлерді іріктеу жүргізіліп, олардың іскерлігі мен ұйымдастырушылық қабілеттері сараланды. Жаңа құрылымды материалды-техникалық қамтамасыз ету мәселелері әзірленді. Қазіргі таңда лайықты кадрларды іріктеу жұмыстары толығымен аяқталды», — деді ЖПҚ басшысы. Сонымен қатар, жергілікті полиция қызметінің басшысы жаңадан құрылған құрылымның алдында тұрған басым және бірінші кезектегі тапсырмалар ретін атады. Мәселен, құқық қорғау саласының жағдайына сағат сайын егжей-тегжейлі мониторинг жүргізіп, шұғыл жағдайдың алдын алу шараларына тез арада кірісу қажет. Оның ішінде, әрбір қызметкердің жұмыс уақытын тиімді пайдаланып, қоғам игілігі үшін жұмыс істеу ләзім. Сонымен қатар, жеке құрамды қызметіне лайықсыз қызметкерлерден тазартып, ондағы тәртіпті нығайту аясында түбегейлі шаралар қабылдап, жергілікті полиция қызметінің жергілікті атқарушы және өкілдік органдармен ынтымақтастық механизмін әзірлеп, құру керек. Б.Абылаевтың айтуынша, қарым-қатынас жұмыстары жан-жақты және барынша нәтижелі болуы тиіс.
Кездесу соңында өңір басшысы Б.Атамқұлов жергілікті полиция қызметінің жұмысын жүйелеп, «100 нақты қадам» Ұлт жоспары аясында заң үстемдігі орнауы тиістігін жеткізді.
