Еңбекші ауданында абаттандыру жұмыстары қарқын алмақ

Шымкент әкімі Ғабидолла Әбдірахымов Еңбекші ауданының әкімі Ғалымжан Ильясовтың жылдық есебіне қатысты. Аудан басшысының айтуынша аталмыш ауданда 180 өндірістік өнеркәсіп орындары орналасқан. Оның ішінде өткен 2015 жылы «Үдемелі индустриялды-инновациялық даму бағдарламасы» аясында және жеке инвестиция негізінде 10 өндірістік кәсіпорын 1000-нан астам жаңа жұмыс орындарымен іске қосылыпты. Аудан әкімі аппаратының ұсынысымен «Әлем — БТ» ЖШС-на 20 мүмкіндігі шектеулі азамат жұмысқа орналастырылды. Ауданда 2015 жылы жаңадан 672 шағын кәсіпкерлік субъектілері тіркелген. 2016 жылы индустриялды- инновациялық даму бағдарламасы аясында 24 жобаның іске қосылуы жоспарлануда. Еңбекші ауданы әкімінің баяндамасына сүйенсек, ауданда 1 жоғары оқу орны мен 8 колледжде 16140 студент, 36 орта мектептерде 40674 оқушы білім алуда. 26 мемлекеттік және 36 жеке меншік мектепке дейінгі мекемелерде 11525 бала болса, оның 2934-і мемлекеттік тапсырыс бойынша тәрбиеленуде. Есепті кезеңде 600 орындық 6 жекеменшік балабақша ашылып, 2014 жылмен салыстырғанда балабақшамен қамтылған балалардың саны 1,8%-ға артты.Есептік жиынына қатысқан көпшілік аудан әкімінің жұмысын қанағатанарлық деп бағалап, қала әкіміне алғысын білдірді. Жиын соңында тұрғындар өз көкейлерінде жүрген сұрақтарын қойып, тұшымды жауап ала білді. Солардың бірі, аудан аумағындағы абаттандыру жұмыстары болатын. Мәселен, 15 шағынауданында тұратын көпшіліктің көкейіндегі осы сауалға шаһар басшысы жауап беріп, оңтайлы шешілетінін айтып, салалық бөлімдерге тапсырма берді. Атап айтар болсақ, қала әкімі Ғабидолла Әбдірахымов алдағы жазда құны 8 млн. теңгелік абаттандыру жұмысын жасап беруге және құрылыс үшін бюджеттен қаражат бөлуге атсалысатынын жеткізді.