Жыл басынан бері Әл-Фараби ауданында 30-ға жуық экологиялық акция ұйымдастырылды. Ал тазалық жұмыстары аптасына екі рет тұрақты түрде өткізіліп келеді. Бұл жолы «Таза Қазақстан» республикалық экологиялық акциясы аясында Бадам өзенінің жағалауында кезекті сенбілік өтіп, оған жастар, тұрғындар мен түрлі мекеме қызметкерлері белсенді қатысты. Шара барысында жағалау аумағында жиналған тұрмыстық қалдықтар шығарылып, айнала ретке келтірілді. Ұйымдастырушылардың айтуынша, мұндай жұмыстар тек санитарлық тазалықты қамтамасыз етіп қана қоймай, тұрғындардың қоршаған ортаға деген жауапкершілігін арттыруға да ықпал етеді. Тазалық жұмыстарының нәтижесінде көшелер, саябақтар, арық-атыздар мен өзен жағалаулары кезең-кезеңімен тазартылып, абаттандыру жұмыстары қатар жүргізілуде. «Таза Қазақстан» акциясы аясындағы игі бастамалар алдағы уақытта да жалғасын табады. Мамандар қоршаған ортаның тазалығы әрбір тұрғынның жауапкершілігі екенін айтып, қала тұрғындарын табиғатты қорғауға және тазалық мәдениетін сақтауға шақырады.
