Мегаполистегі Жаңаталаптық ағайын Мәжілісмендерге өтініш айтты

Уәдені бұзған – ұяны бұзғанмен тең. Бұл халқымыздың бойына сіңген ұлағатты сөздерінің бірі. Биліктің жыл сайын беретін уәдесінен шаршаған Жаңаталап елді мекенінің тұрғандары осы жолы халық сайлаған азаматтарға өтініш айтты. Яғни, Парламент Мәжілісінің депутаттары Абай ауданындағы Жаңаталапқа барып, жергіліктің халықтың өкпе-назына құлақ түрді.

2858 тұрғыны бар Жаңаталап елді мекені таза суға әу бастан зәру. Алтынтөбе, Көкбұлақ, Тәуелсіздікке 20 жыл, Жаңаталап, Игілік деп аталатын аймақтағы ағайын биліктегі басшыларға сенімді жоғалтқан тәрізді. Десе де, депутаттар алдамас деген тағы бір үмітпен кездесуге келіпті. Суық күннің ызғары аяқтан өтіп, бойды алсада әлеуметтік мәселені айтуға басқосты.

Бес жылдан бері таза суды армандап, Парламентте отыратын депутаттарға алаңдап отыратын тұрғындар 2020 жылдан зор үміт күтіп отыр. Билікке біреу келіп, біреу кетер бірақ тұрғындар табжылмайды ғой. Сондықтан, халықтың өтініші аяқсыз қалмаса дейді. Е суы, е газы жоқ Жаңаталаптағы тұрғындардың тіпті жері мен үйінің құжаты да дұрыс емес болып шықты. Абай ауданының әкімдігі даладағы суыққа қарамастан кездесуді сыртқа ұйымдастырған. Бірақ, тұрғындарды бұл жағдай алаңдата қоймады. Қалай да депутаттарға өкпе-назын жеткізу керек болып тұр.

Тұрғындар тарапынан Мәжілісмендерге бас қалаға берілетін есеп үшін емес, елден алғыс алу үшін жұмыс істеңіздер деген өтініш айтылды. Елді мекендегі ақсақалдар, қордаланған мәселені жеткізе алатын аға буын өкілдері мен асыл жанды аналар жиылған кездесу кезінде таза су биылғы жылы шешілетін болды. Келесі проблема ми батпақ жолдарға келіп тіреліп тұр. Абай ауданындағы тұрғындардың негізгі арманы мегаполис мәртебесіне сай болсақ екен дейді. Әлеуметтік мәселені әбден қозғаған Жаңаталап тұрғындары сөз соңында «шүкірлік» айтуды ұмытпады. Қазыналы қариялар бата беріп, депутаттармен қол алысып, уәделесіп жатты. Иә, «уәде бұзған кісіден, өтіп кеткен жел артық» деген нақылды ұмытпайық. Ақшаға тақ сатып алсақта, аброй сатып алмаспыз.