Сайрам ауданының Көлкент ауылдық округіне қарасты Ханқорған елді мекеніндегі №44 «Мәдени» жалпы орта мектебінің шатыры ұшты. Аталмыш білім мекемесі 2011 жылы пайдалануға берілген. Мұнда бүгінде 500 ге жуық оқушы білім алады. Апатты жағдай екпіні қатты дауыл жел салдарынан 23-наурыз күні орын алған. Яғни, білім мекемесінің екі мың шаршы метрге жуық шатыры құлаған.
Апаттан зардап шеккендер жоқ. Бұл жағдай елімізде коронавирус індетіне баланысты жарияланған төтенше жағдайға байланысты мектеп оқушыларына берілген уақытша демалыс кезінде орын алып отыр. Қазіргі таңда Көлкент ауылдық округі тарапынан орын алған жағдайға байланысты ауданға және құзырлы мекемелерге хабарлама беріліп, мектепке әкімдіктен жауапты маман да бекітілген. Осылай деген округ әкімі Мамыржан Шадиев мектеп шатыры шұғыл арада, оқу процесі басталғанға дейін қалпына келтірілетіндігін жеткізді.
«Айғақ-ақпарат»
