Мәслихат депутаттарының алғашқы буыны марапат төрінде
Тарихи кезеңдерге толы 2015 жылы тағы бір айтулы мереке тойланып жатыр. Ел-жұртпен етене жұмыс жасап, халық игілігі үшін қыруар тірлік атқарған Қазақстан Мәслихаттарына биыл 20 жыл. Осы мерейлі мерекеге орай, Оңтүстік өңіріндегі алғашқы шақырылым депутаттары мен бірқатар халық қалаулылары облыстық мәслихаттың хатшысы Құдайберген Ержанның қабылдауында болып, 20 жылдықтың арнайы марапаттауына ие болды.
Халықтың мұңы мен жоғын жоқтаушы, бұқара мен биліктің арасында алтын көпір бола білген мәслихат депутаттарының қоғамдағы рөлі ерекше екені анық. Осыдан 20 жыл бұрын алғашқы шақырылымда сайланған халық қалаулылары уақыт өте келе мұның ақиқатын іс жүзінде көрсетті. Тәуелсіздік жылдарында қоғамды демократияландыруға, халықтың әл-ауқатын арттырып, экономиканың нығаюына сүбелі үлес қосқан азаматтардың еңбегі елеулі. Сондықтан айтулы мереке қарсаңында Облыстық мәслихат хатшысы ел жадында еселі еңбегімен танылған жандарды құттықтап, 20 жылдықтың төсбелгісін табыс етті.
Расында да егемендік алып еңсесін тіктеген, аяғына енді ғана тұра бастаған Қазақстан үшін мәслихат құрылған жылдар қиын кезең болатын. Дегенмен қиындыққа мойымаған жас мемлекет жоғары өрледі, оның алға басқан қадамдарына халық қалаулыларының қосқан үлесі аз болмады. Сондықтан бүгінгі депутаттар алғашқы буынның еңбегі орасан болды десе, ел ағалары да мәслихаттың қазіргі атқарып жатқан қызметін ауқымды деп біледі. Сондай-ақ, оның алдағы жұмысына да тілектес.
Бұл күні мерекелік төсбелгімен марапатталғандар:
Қуаныш Бөлтеев
Салдар Жамалов
Мұрат Тағаев
Қанатбек Досалиев
Шалқар Әбішев
Әбдіәзім Атымтаев
Руслан Бексейітов
Жеңісбек Тұрғанов
Камардин Сәрсенбеков
20 жылдың ішінде ауыз толтырып айтарлықтай өзгеріске енген, экономикасы мен саяси ахуалы нық Қазақ елі үшін ендігі меже Мәңгілік елді қалыптастыру. Бұл ұлы жолды бағындыруда қоғамда алар орны ерекше, мемлекеттік басқарудың маңызды бөлігі саналатын мәслихаттың рөлі арта түспек.
Абдумутали ЖҰМАШ
