Мәжіліс депутаты жұмыс сапарымен Оңтүстікте жүр

ҚР Парламенті Мәжілісінде Қазақстан Халқы Ассамблеясы жанынан арнайы фракция құрылған. 31 депутаттан тұратын аталған фракция  ұлтаралық келісім мәселесі бойынша жұмыс жасайды. Бүгінгі күні  Елбасының 100 нақты қадам «Ұлт жоспары» реформасына іске асыруда халық қалаулылары өңірлерді аралап, насихат жұмыстарымен айналысуда. Солардың бірі қарымды қаламгер, Мәжілісмен Сауытбек Әбдірахманов.  Сауытбек Әбдірахманов – Парламентке Қазақстан Халқы Ассамблеясы жанынан сайланған 9 депутаттың бірі. Депутаттық мандатқа қол жеткізгенге дейін де, кейін де еліміздің саяси бағыт-бағдарын газет беттеріне жариялап жүрген қаламы қарымды қаламгер, жерлесіміз. Парламенттік каникулға сәйкес  халық қалаулылары өңірлерді аралап,  Елбасының 100 нақты қадам «Ұлт жоспары» 5 инстиутционалдық  реформасын жіті түсіндіріп, туындаған сұрақтарға жауап беруде.  Сөз басын «Біздің міндет- ел бірлігін жандандыру» деп бастаған Сауытбек Әбдірахманұлы, мұнан кейінгі кезекте  әлемдік экономикадағы іркілістердің болу себебін нақтылы статистикаға сүйене отырып, түсіндіруге тырысты.  Қазақ тіліндегі «Ұлт» сөзі бір емес, бірнеше мағыналарға ие. Мемлекет басшысы  «Ұлт жоспары»  деп атау берген маңызды реформаның тек «қазақ» халқына тән емес екендігін қазақстандықтар жіті ұғынуы тиіс. Бүгінгі ел экономикасының даму қарқынына тоқталған мәжілісмен «Шикізатқа байланған елдің кері кетпеуін – жетістік» деп бағалады. Сонымен қатар жер көлемі кең, ата кәсібі мал шаруашылығы болып табылатын қазақ елі үшін еттің жартысын сырттан алу саясатын  Сауытбек Әбдірахманұлы дұрыс үдеріске баламады. Ұлттық тәрбиеге аса көңіл бөлуді мақсат тұтқан облыстық «Аналар кеңесі» бүгіннің өзінде жаңа бастамаларымен танылып үлгерді. Облыстық, қалалық, аудандық, ауылдық деңгейдегі түрлі саладағы нәзік жандылардың басын қосқан бұл ұйымның  1130 мүшесі бар. Сондай-ақ «Аналар кеңесінің» құрамынан облыстық Қазақстан Халқы Ассамблеясының өкілдері  де қамтылған.  2 сағаттық жиыннан соң Сауытбек Әбдірахманұлы «Коғамдық келісім» сарайында Қазақстан Халқы Ассамблеясының мүшелерімен дөңгелек үстел өткізді. Жиында депутат мырза: «Кейбір орын алып жатқан екі азаматтың арасындағы кекілжіңдер ұлттар татулығына нұқсан келтірмеуі керек» деп, осы мәселені ерекше атап өтті.  Сонымен қатар қоғам үшін аса маңызды саналып отырған терроризм, діни сауаттылықты арттыру сынды жұмыстар Парламентте қаншалықты іске асып жатқандығы жөнінен қатысушылар түрлі сауалдар жолдады.