Бүгін Түркістан қаласына арнайы сапармен келген Қазақстан Республикасының Тұңғыш Президенті-Елбасы Нұрсұлтан Назарбаев рухани астананың бүгінгі даму тынысымен танысты.
Орталықта ашылған Назарбаев атындағы арбатта өткен мерекелік концерттің куәсі болды.
Кеш барысында Нұрсұлтан Назарбаев: «Түркістанды орталық жасау — Тәуелсіздік алған бірінші күннен бастап есте болған. Менен бұрынғы басшы ағаларымыз да есте ұстаған, арғы тарихқа бармай-ақ, өткен ғасырдың өзінде Түркістан Республикасын құрамыз деп, Түркістан бюросы деп осы жерде көп шаралар өтті.
Терең тарихқа үңілетін болсақ, бұл қасиетті өңір, қасиетті жер 21 ханымыздың жерленген жері. Сұлтандардың, әулиелердің осы жерде мәңгілік орнын тапқан еліміз үшін өте киелі жер. Тәуелсіздік алғаннан кейін әрине мен көзді осыған тіктім. Тіпті, астананы таңдаған кезде де келіп, біраз ойландым. Бірақ оған жағдайы болмады өздеріңіз білесіздер. Міне, енді уақтысы келді.
Түркістан қаласын облыстың орталығы жасап, қайтадан жандандырып, елімізге, осы киелі орданы қайтару мүмкіншілігі қолымызға тиді. Сондықтан бұл енді бүкіл Түрік дүниесінің орталығы екендігі барлығымызға белгілі Оңтүстіктегі ағайындар Өзбекстан, Қырғызстан Түркіменстан барлығы қуанып жатыр. Бұйырса, олар да бізге ат салысып бізге көмектеседі деп сенемін. Өздеріңізге белгілі, осыдан бірнеше жыл бұрын Түркістанның 1500 жылдығын атап өтеміз деп біраз шаруаны жасаған болатынбыз.
Түркістанның орны жеке дара. 175 ғимарат салу жоспарланған. Соның 102 сі биыл іске қосылатын болады» — деп атап өтті.
