«Құлақтан үнің кетпестей, сыңғырла, соңғы қоңырау!»

Арыс қаласының Қызылкөпір ауылында 7 оқушы мектеппен қоштасты. 166 бүлдіршін білім алатын №3 жалпы орта білім беретін мектеп бүгінгі соңғы қоңырау мерекесін ерекше тойлады. Қанатын қаққалы тұрған жас түлектер мектеп қабырғасындағы соңғы күндерінде ұзтаздарға шексіз алғыс айтумен, ән-бимен өткізуде. Қызығы мен қиыншылығы мол, әр жылы қайталанбас тариxқа толы болған 11 жыл оқушылар үшін бүгінде көзді ашып жұмғанша өткен. Енді олар үшін қоңырау соғылмайды.

Себебі, бұл соңғы қоңырау үні — балалықпен қоштасу, үлкен өмірмен қауышу үні болмақ.

Қызылкөпір ауылында аталып өтілген салтанатты шара жылдағы дәстүр бойынша «Құлақтан үнің кетпестей, сыңғырла, соңғы қоңырау» тақырыбында өтті. Мектеп бітіргелі жатқан 7 оқушының да алдағы жоспарлары мен талаптары мықты. Білім ордасының қабырғасында жүріп-ақ жарыстарда топ жарған оқушылар көп. Олар осы бір айтулы күні мектеп басшысының атынан арнайы алғыс xаттарға ие болды. Ал, оларды жақсы жолға салып, білімін шыңдаған ұстаздар қауымы да марапаттаусыз қалмады.

Арыс қаласы бойынша сайыстар мен білім деңгейі жағынан алғашқы орындарда көрініп жүрген №3 жалпы орта мектебін қуанышымен құттықтау үшін ҚР Мемлекеттік істер және сыбайлас жемқорлыққа қарсы іс-қимыл агенттігі Түркістан облысы бойынша департаментінің бас маманы Гүлжан Есенқызы арнайы келді. Мемлекеттік қызметкер оқушыларға тек ыстық ықыласы мен түлектерге деген тілегін жеткізді.
Кеше ғана тұлымдары желбіреп, жүректері лүпілдеп, мектеп қабырғасын имене аттаған ұл-қыздар бүгінде ойы толып, бойы өсіп, алтын ұя мектебімен қоштасуда.