Әлеуметтік бастамалардың жүзеге асырылуы мәжілісмендердің назарында

Шымкент қаласына ҚР Парламенті Мәжілісінің депутаттары келді. Елбасы Н.Назарбаевтың табысы аз және көпбалалы отбасыларды қолдауға бағытталған әлеуметтік бастамаларды жүзеге асыру барысымен танысу. Сонымен қатар, сапар барысында бірқатар әлеуметтік нысандарды аралап, олардың сапасына аса мән беріп, өздері тарапынан сыни пікірлерін де жеткізді.

ҚР Парламенті Мәжілісінің депутаттары Дархан Мыңбай, Әбдіманап Бектұрғанов, Сәкен Қаныбеков, Уәлихан Қайназаров, Фахриддин Қаратаевтар Шымкент қаласындағы бірқатар нысандарды аралады. Әуелі, «Құтты мекен» ұлттық жобасы аясына Бадам өзенінің үстінен салынып жатқан көпірдің жұмысымен танысты. Бұл көпір Қонаев гүлзарының жалғасы ретінде жүзеге асып жатқан жоба. Оның жүзеге асуы 7 кезеңнен тұрса, дәл қазір атқарылып жатқан жұмыстар 3-ші кезең екен. Мердігер мекеме «BI group» компаниясы. Көпірдің өзіне жұмсалатын қаражат 1 млрд 200 млн теңгені құраса, бүгінде қалалық бюджет есебінен бөлінген сомма тек 200 млн теңге. Құрылыс жұмыстары уақытша тоқтап тұр. Бәлкім осы себеп болды ма, басшылықтың төбе көрсетпегендігінен бе Мәжілісмендер аздап ашуға булықты. Дегенмен, олар мердігер компанияның «көпірдің осы жылы толық аяқталады» деген уәдесін алып кетті.

Осыдан соң, Сәуле мөлтек ауданындағы №76 мектеп ұжымымен кездесті. Білім ошағына қосымша жаңа 300 орындық оқу ғимарат салынған. Онда спорт зал, шеберхана мен асхана бар. Бұл  кабинеттер ескі ғимаратта болмаған. Сондықтан да жаңа білім ошағын тездетіп, оқу жылына пайдалануға берілу жоспарлануда. Алайда мәжілісмендер жаңа оқу ғимаратынан да кемшілік тапты. Ол қандай кемшілік дейсіз ғой?! Бастауыш сынып оқушыларының отыратын орындығы стандартқа сай келмейді. Баланың дені сау болып өсуі аса маңыздылығын ескерген мәжілісмендерге, мұндағы мамандар аталған кемшілікті тез арада шешімін табатындығын айтты.

Сондай-ақ, аталмыш мектептің оқушыларымен жүздесіп, ұстаздармен тілдесті. Дегенмен, өңірімізге аранайы келеген халық қалаулылары халықтың да үніне назар салып, қолдайтындықтарын жеткізді.