Бейсенбіде ҚР Премьер-Министрінің бірінші орынбасары Асқар Мамин Түркістан облысына келді. Жұмыс сапары барысында облыстың әкімі Жансейіт Түймебаев рухани қаладағы атқарылып жатқан құрылыс жұмыстарымен таныстырды. Асқар Мамин бастаған жұмысшы топ нысандарды аралап болған соң, облыстың актив өкілдімен кездесіп, Түркістандағы құрылыстарды және оның бюджетін нақтылап кетті.
— «Бұл ән бұрыңғы әннен өзгерек» деп ақын Шәкәрім Құдайбердіұлы айтпақшы бұл жолғы есептік кездесу басқаша. Бүкіл жұрттың назарында тұрған Түркістан облысының әкімі Жансейіт Түймебаев тұңғыш рет есеп берді. Жаңа орталықтағы жаңа облыстың тариxи есептік кездесуінде мәтелге лайықты сөз тіркестері айтылды. «Не шықса да Оңтүстіктен шығады» деген сөздің астарына тоқталған Түймебаев Түркістанның болашағын жиылған жұртқа жария етті. Руxани астанадағы есептік кездесуге қатысқандар қайраталып, руxани жігерленді.
— Шымкент қаласының әкімі Ғабидолла Әбдірахымов халық алдында есеп беру жиынын өткізді. Жыл бойында атқарылған жұмыстарға қорытынды жасалып, алдағы уақытта атқарылатын ауқымды жобалар сөз болған жиында қала тұрғындарын толғандырған сауалдарға да жауап берілді. Есепті жиында мәлім болғандай республикалық маңызға ие шаҺарымызда биыл қоғамдық көліктер мәселесі толыққанды өз шешімін табатын болады. Сонымен бірге қаламызда бір мезетте 2 мың жолаушыны еркін қабылдай алатын заманауи үлгідегі әуежай құрылысы да бастау алмақ. Ал ең бастысы қала әкімінің бастамасымен әлеуметтік көмекке мұқтаж аналардың бір реттік жәрдемақысы биыл 25 мың тенгеден 100 мың тенгеге ұлғайтылып отыр.
— Таразда да қала әкімінің есебі тыңдалды. Халық алдында 2018 жылды қорытындылап, биылғы жоспарларымен таныстырған басшымен кездесуге Тараз түгел жиналмаса да, мәдениет үйіне сыйған азаматтардың айтар ұсынысы сағатқа созылды.
— Түркістан облысында 59 қызмет түрі бойынша тарифтер бағасы төмендеді. Арзандатылған бағалар 2019 жылдың 1 қаңтарынан бастап қолданысқа еніп үлгерді. Бұл туралы, Облыстық Монополияға қарсы департаменті басшысының орынбасары Қымбат Серікұлы баспасөз жиынында мәлімдеп, тарифтер бойынша толығырақ айтып берді.
— Қазақ вальсінің королі Шәмші Қалдаяқов білім алған Қапланбек жоғарғы аграрлық-техникалық коледжіне биыл 90 жыл. 1929 жылы іргесі қаланған оқу ордасынан бүгінге дейін 40 мыңнан астам шәкірт білім алған. Оның ішінде бүгінде ісін өрге дөңгелетіп отырған елге танымал жеке кәсіпкерлерде бар. Қазіргі таңда колледждегі алдыңғы толқынның 1000-нан астам ізбасарлары, жас талапкер білім алуда.
— Кеңес әскерінің Ауған жерінен шығарылғанына 30 жыл. Атаулы күнге орай №59 жалпы орта мектепте «Болашаққа бағдар: Рухани жаңғыру» бағдарламасы аясында «Мен, өз Отанымның батыл қорғаушысымын» атты әскери — патриоттық сайыс өтті. «Ауған соғысында ерлікпен қаза болған жауынгерлерді еске алу» ауыспалы кубогі сарапқа салынды.
— Түркістан облыстық клиникалық ауруханасында шетелдік дәрігерлердің қатысуымен буын ауруына ота жасалды. Мастер классты Германиядан және Ресейден келген білікті ортопед дәрігерлер өткізді. Маңызды ота 63 жастағы Ордабасы ауданының тұрғынына жасалды. Егде жастағы науқас отаға дейін амбулаториялық ем қабылдаған. Алайда, ешқандай нәтиже болмай, ота арқылы тізе арасына протез қоюға тура келген. Шетелдік дәрігерлер бұл жұмысты жүзеге асырып, 2 сағаттық ота жасады. Дәрігер мамандардың айтуынша, буын ауруы артық салмақтың әсерінен пайда болады. Сондықтан да, дұрыс тамақтанып, артық салмақ жинамауды, яғни қалыпты дене пішімін сақтауға кеңес береді.
«Айғақ-ақпарат».
