Түркістан облыстық клиникалық ауруханасында еліміздің үздік генетиктері бас қосты. Онда жүкті ана мен дені сау бала жағдайы сөз болып, біршама мәселелер талқыланды. Мегаполис дәрігерлерімен тәжірибе алмасу үшін Алматыдан мамандар арнайы келген. 
Медицина саласы қашан да өзекті тақырып. Дәл бүгінгі қоғамда адамға атауы жат ауру түрлері де көбеюде. Алайда қол қусырып қарап отырған медицина мамандары жоқ. Керісінше, бір-бірімен тығыз қарым-қатынас жасап, тәжірибе алмасуда. Еліміздің үздік генетиктері бас қосқан жиынға Шымкент қаласының педиатрлары, гинегологтар мен неврологтар қатысты. Бүгінгі семинарды өткізуге келген Алматы қаласының Молекулярлық мединициналық орталығының мамандары жергілікті дәрігерлермен жұмыс жасаймыз деп отыр.
Жүкті әйелдерге сирек қойылатын диагноздың бірі — преэклампсия жайлы естуіңіз бар ма? Жүктіліктің жеңіл формадағы асқынулары әйелдердің 3 пайызында кездессе, ал ауыр формасы 1-2 пайызында кездеседі екен. Бұл кезде ең әуелі бүйрек, бауыр, қан ұйыту жүйесі және ми, сонымен қатар бала жолдасы зақымданады. Преэклампсияның ауыр формасы анасы мен нәрестенің денсаулығына айтарлықтай зиянын тигізіп, тіпті өлімге де алып келуі мүмкін. Әлем бойынша жылына 70-80 мың әйел осы ауру түрінен көз жұмса, 500 мыңға жуық сәби шетінеп кетеді екен. Бүгінде бұл асқынулардың дамуында 30-дан астам теориясы бар. Мамандар осындай науқастарды емдеудің тиімді әдісін іздесе де , әзірше еш нәтиже шықпаған. Ал, дәлелденген бірден-бір емдеу әдісі – анасы мен жаңа туған нәрестеге орынды көмек көрсете алатын, емдеу мекемелеріндегі босандыру деп отыр мамандар.
«Айғақ-ақпарат»
