«Берекені көктен тілеме, бірлігі мол елден тіле» деген сөз бар дана халқымызда. Жылдағы жиын-терімнен бақыт бастауына жетелейтін молшылықтың белгісі саналатын берекелі мейрамды жұртшылықтың асыға күтетіні рас. Сарыағаш ауданында ауыл шаруашылығы еңбеккерлеріне арналған биылғы «Алтын күз–2018» мерекесі жаңаша сипатта аталып өтті. Неге десеңіз, ауыл шаруашылығы саласында тынбай еңбек еткен бірқатар үздіктер марапат төрінен көрінді. Осылайша, бұл күні төккен тер мен еткен еңбек ескерусіз қалмады.
Дәстүрлі «Алтын күз» мерекесін тойлауға саялы Сарағаш жерінің таңдалып алынуы бекер емес. Себебі, аудан тұрғындары ауыл шаруашылығына бейім келеді. Ала жаздай дала төсінде тер төгіп, еселі өнімге қол жеткізген жергілікті шаруалардың биылғы жетістігі ауыз толтырып айтуға тұрарлық. Яғни саладағы межеленген жоспарлар артығымен орындалып, ағымдағы жылдың 10 айында өндірілген ауыл шаруашылығы өнімдерінің құны 58 млрд 392 млн тенгені құраған, жыл соңына дейін 60 млрд 200 млн теңгеге дейін орындалады деп күтілуде. Осындай көрсеткіштері арқылы облыс көлемінде алғашқы орыннан көрініп отырған Сарыағаш ауданындағы «Алтын күз-2018» мерекесі жәрмеңкеден бастау алды.
Аталған іс-шарада Түркістан облысының әкімі Жансейіт Қансейітұлы ауыл шаруашылық өнімдерінің көрмесін аралап, мерекенің ашылу рәсіміне қатысты. 
Елбасы өзінің «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында ауыл шаруашылығындағы еңбек өнімділігін және экспорт көлемін алдағы 5 жылда 2,5 есеге ұлғайту керек деген тапсырма берген болатын.Осы орайда, облысымызда өткен жарты жылдық саладағы жалпы өнім көлемі 146,4 млрд теңгені құрап, өткен жылдың тиісті кезеңімен салыстырғанда 25,4 млрд теңгеге артқан. Республикада өнім көлемі бойынша облыс үлесі 14,6 пайызды құрап, республика бойынша 2 орынға ие.
Осылайша, Сарыағаш аудандық ауыл шаруашылығы бөлімінің басшысы Нұрболат Талипов аудандағы осы уақытқа дейін жеткен жетістіктер мен толағай табыстарды ел алдында таразылады. Келешектің кемел істерін бірігіп атқаруға шақырды.
Ауданда ауыл шаруашылығы еңбеккерлерінің салтанатты шеруі өтіп, әр ауылдық округ өздерінде қандай өнімдер өндірілетінін көпшілікке паш етті. Жоғары көрсеткішке қол жеткізген шаруалар мен ауыл әкімдері, мекеме басшылары арнайы сертификатпен және бағалы сыйлықтармен марапатталды. Атап айтқанда Дарбаза ауылдық округінен аудан бойынша үздік тәлім бидайдан жоғары өнім алған ЖШС «Дарбаза» басшысы Қосалиев Жұмадилла, Амзеев Бердалы «Бердалы» ш/қ және де ауыл тұрғыны, ауданның жер қатынастар бөлімінің бас маманы Тұрлыбеков Мадияр секілді азаматтар бар.
Осылайша сарыағаштықтар Алтын күз мерекесін ерекше леппен атап өтті. Шара соңыаудан өнерпаздары дайындаған концерттік бағдарламаға ұласты.
Жансая Елемесова
