Астана әкімдігі өкілдерінің қызметтік көліктен бас тартып, таксиге отырғаны бюджет шығынын айтарлықтай азайтты, деп хабарлады «Хабар 24» тілшісі.
Бір ғана қыркүйек айында шаһар қазынасынан тасымалға жұмсалатын қаржы көлемі 60 пайызға қысқарған. Осылайша елорданың экс-әкімі Әсет Исекешев бастаған, жаңа басшы Бақыт Сұлтанов қоштаған тың жоба өз тиімділігін дәлелдеп жатыр. Әкімдік өкілдерінің қымбат қызметтік көлікпен қоштасып, қарапайым таксиге отырғанына екі айдай уақыт өтті.
Әуелде «бұл қалай жүзеге асады» деген әңгіме қызу талқыға түскен болатын. Бірақ қазір әкімдік өкілдерінің такси шақырғанына қызметкерлердің өзі де, тұрғындардың көзі де үйренді. Таңданатын ештеңе жоқ. Қызмет әлемге белгілі жүйе негізінде жұмыс істейді екен. Яғни көлік қажет бола қалса, арнайы қосымшаны ашып, тұрған жерің мен баратын нүктеңізді белгілейсіз. Тапсырысты жақын маңда жүрген кез келген такси қабылдайды. Ең бастысы, оларды мақсатсыз, бей-берекет шақыруға жол берілмейді.
Мұрат Мұханбетов, қала активтерін қызметпен қамту бөлімінің басшысы:
— Жүйе толығымен автоматтандырылған. Біздің басқарма әрбір тапсырысты бақылап отырады. Таксиді кім шақырды? Қайдан шақырды және қайда барды, такси қанша уақыт күтті, барлығы жазылып отырады. Егер таксиді өз мүддесіне пайдаланылғаны туралы күдік туындаса, әкімдік аппаратына шағым жіберіп, ақ-қарасын анықтаймыз. Алғашқы екі айдың есебі бойынша, такси қызметіне аудан әкімдіктері мен сапаны бақылау басқармасының мамандары көп жүгінген. Ол түсінікті де. Өйткені бұл саладағы шаруаны бір орында отырып атқару мүмкін емес.
Дегенмен мамандар тағы бір тың әдіс енгізу арқылы шығынды азайтпақ ниетте. Мұрат Мұханбетов, қала активіне қызмет көрсету бөлімінің басшысы: — Қызметкерлердің әрі-бері қатынауын азайту мақсатында видео-конференциялар немесе басқа да тың тәсілдер енгізуге тырысып жатырмыз. Бизнесі оңтайландыру арқылы қызметкерлердің жолға кететін уақытын азайтпақпыз. Жоба сәтті жалғасын тапса, алдағы бес жылда шаһар қазынасынан 1 млрд теңге үнемделеді. Ол түрлі әлеуметтік жобаларға жұмсалмақ.
Ал әкімдікке тиесілі қымбат көліктер қайда кетті дейсіз бе? Әлеуметтік мекемелер, балабақша, арнаулы мектептер мен Ішкі істер департаментіне берілген.
Бірақ олардың да қуанышы ұзаққа созылмауы мүмкін. Шаһар басшылығы келесі жылдан бастап өзіне қарасты барлық ведомствоны такси қызметіне көшіруді жоспарлап отыр. Бұл жаңашылдықтың тағы бір тиімді тұсын айтайын. Таксилерге автобусқа арналған арнайы жолақпен жүруге рұқсат етілген. Яғни олар қаладағы кептеліс кезінде кезек күтіп уақыт жоғалпайды. Бұл дегеніңіз – әкімдік қызметкерлері жұмыс уақытын жолда емес, халыққа нәтижелі қызмет көрсетуге жұмсайды деген сөз.
Дереккөз: 24.kz
