— Түркістан облысында келер жылы 8 медициналық нысанның құрылысы басталмақ. Бұл туралы аймаққа арнайы келген Денсаулық сақтау министрі Елжан Біртанов мәлімдеді. Алдымен жергілікті емханалардың біріне аялдаған сала басшысы өз әріптестеріне Елбасы Жолдауындағы негізгі міндеттерді жан-жақты түсіндірді. Мұнан соң Түркістан облысының әкімімен бірге қаладағы жоғары медицина колледжіне барып, студенттермен жүздесті.
— Жақында ғана сайланған ҚР Парламенті Сенатының депутаттары Нұрлан Бекназаров пен Дархан Сатыбалды өз жұмыстарына белсене кірісті. Бұлай деуімізге себеп, Сенаторлар «Нұр Отан» партиясы Шымкент қалалық филиалының Саяси Кеңесі мүшелерімен кездесті. Оның негізгі мақсаты – Мемлекет басшысының 2018 жылғы 5 қазанда қазақстандықтарға арнаған кезекті Жолдауын қолдау. Мәжіліс барысында Президенттің кезекті маңызды құжатында көрсетілген барлық бағыттарға жеке-жеке тоқталып, оның мәні мен маңыздылығы толығымен айтылды. Сондай-ақ, партия қызметкерлерімен пікір алмасып, алда атқарылатын жұмыстардың жоспарлары да қызу талқыланды. Осы орайда Сенат депутаттары бұл Жолдаудың ерекшелігі көп, соның ішінде жастар үшін серпін беретін жағымды тұстары да жеткілікті, әрі бұл оларға берілген зор мүмкіндік дейді. Естеріңізге сала кетейік, 5 қазан күні үшінші Мегаполистен алғаш рет Сенаторлыққа екі депутат сайланып, оларды Орталық сайлау комиссиясы 8 қазан күні тіркеген болатын.
— 19 қазан — Құтқарушылар күні. Басын қатерге тігіп өзгеге өмір сыйлайтын маман иелерінің төл мерекесі. Айтулы датаға биыл 23 жыл толып отыр. Осыған орай «Абай» саябағында төтенше жағдайлар қызметі барысында өмірден өткен құрбандарға арналып, ескерткіш ашылды. Салтанатты шараға қала мэрі Ғабидолла Әбдірахымов пен ІІМ орынбасары Юрий Ильин арнайы келіп, қатысты.
— Қазығұрт ауданының халқы 90 жылдық мерейтойын тойлады. Салтанатты шара «Қазығұрт» монументінің ашылуы рәсімінен бастау алды. Мерекеге Қазығұрт ауданының тумалары, ҚР Парламент Сенатының депутаты Әли Бектаев, Парламент Мәжілісінің депутаты Сауытбек Абдірахманов, Мемлекет және қоғам кайраткерлері мен зиялы кауым өкілдері қатысты. Елбасының «Болашаққа бағдар: рухани жаңғыру» мақаласы негізінде 90 жылдык мерекеде ауданның әзірлеген этнокөрмесі көпшілікке ұсынылды. Сондай-ақ, мерейлі күні «Болашақ» мөлтекауданындағы 16 пәтерлі 4 тұрғын үй, 100 орындық өнер мектебі, 210 орындық дене шынықтыру-сауықтыру кешені пайдалануға берілді.
— Қазығұрт ауданында 90 жылдық мерейтойға орай спорттық ойындар да ұйымдастырылып, дүбірлі додалар өткізілді. Соның бірі ересектер арасында ұлттық ат спорты түрлерінен ұйымдастырылған облыстық денгейдегі турнир болатын. Яғни қаржылай жүлделер тігілген командалық көкпар ойыны мен жалпы көкпар додасы білекті де жүректі шабандоздардың басын қосты. Айта кету керек, командалық көкпардың жүлде қоры 1 млн тенгені құраса, жаппай көкпар тарту кезеңінде алғашқы салым 90 мың тенгеден басталды.
— Ордабасы ауданының инфрақұрылым саласы жоспарға сай орындалуда. Аудандағы елді мекендерді көгілдір отынмен, ауыз сумен және электр жүйесімен, сондай-ақ, тегіс жолдармен қамтамасыз ету мақсатында жүйелі жұмыстар жүргізілуде. Жауапты мамандар Мемлекет басшысының Жолдауында көрсетілген экономикалық–әлеуметтік дамудағы тапсырмаларды жүзеге асыруды көздейді.
