Ұлты – өзбек, жаны – қазақ

Беу, дүние жалған-ай… Күні кеше Алла Тағала аманатқа берген аз өмірдің кезекті бір белесіне көтеріліп, өзімді-өзім жұбатып, дос, туысты қуантып отырған тағдырымның шуақты бір сәтінде жарқыраған күннің көзін басқан қарашұбар бұлттай болып Ташкент шаһарынан денені мұздатып,  жүректі  сыздатқан қайғылы хабар жетті. Насыр аға Фазыловтың ұлы Хандемей  әкесінің дүниеден озғанын хабарлады.

Сол сәт көз алдыма көркемсөздің көрнекті шебері, Өзбекстан Мемлекеттік сыйлығының екі мәрте лауреаты, Қазақстан Президентінің «Бей­бітшілік пен руханият» сыйлығының ие­гері Насыр Фазыловтың жұмсақ жым­иып күлімсіреп тұратын сүйкімді бейнесі елес­теді. Ойыма өнегемен өрілген өмір жолы орал­ды.
Көзі тірісінде-ақ өзі абызға, аты аңызға ай­нал­ған ұлты – өзбек, жаны – қазақ Насыр Фа­зылов екі елдің – өзбек пен қазақтың ортақ мақ­танышы еді. Ол М.Әуезовтің «Абай жо­лы» эпопеясын, С.Мұқановтың, Ғ.Мүсі­репов­тің шығармаларын өзбек тіліне шебер аударды. «Ақ аруанымды» да өзбекше сөйлетті. Қа­зақ­станда өткен мерекелер мен атақты мерей­тойлардың бәріне де қатынасты.
Туысқан екі халық арасында алтын көпір бол­ған Насыр Фазыловтың Сәбит Мұқановпен дос­тығы, Сәбең өмірден озғанда досы Ғафу ғұлам­аның қабірінен бір дорба топырақ әкеліп, ұлы жазушының қабіріне салғаны аңызға ай­налған ұлағатты әңгіме болып еді.
Өткен жылы Ташкентте өзбек тілінде шық­қан бір томдық шығармаларымның тұсау­кесер кешінде 90 жастағы Насыр Фазылов: «О, ме­нің өзбектерім, қазақ бауырларымызды құр­меттеңдер! Өзбекке қазақтан жақын туыс, дос жоқ. Ұлы халық – қазақпен жолдас бол­саң жол­да қалмайсын!» деп тебірене сөй­леп, терең мағы­налы да аталы сөз айтып еді.
Қош бол, қоштасуға қимайтын аяулы асыл аға!
Жаныңыз жаннатта болсын!

Сәбит ДОСАНОВ,
Мемлекеттік сыйлықтың лауреаты

P.S.  Насыр Фазылов (1929 ж. т., Түркістан ауданы) – жазушы. Қазақстан Республикасы Президентінің «Бейбітшілік және рухани келісім» сыйлығының, Халықаралық «Алаш», «Ел құрметі» сыйлықтарының лауреаты.  Алғашқы кітабы 1959 ж. жарық көрді. «Ағыстар», «Робинзондар», «Құс қанатымен», «Қархат», «Көркем иірімдері», «Дидар», «Бір-ақ атар тәпенше», т.б. кітаптары бар. «Ұстаздың аясында» атты кітабы үшін Өзбекстан Мемлекеттік сыйлығын алған. Аудармамен көп шұғылданған. Қазақ жазушыларының отыздан астам кітабын өзбек тіліне аударды.