Облыс әкімі Бейбіт Атамқұловтың төрағалығымен ОҚО Қазақстан Халқы Ассамблеясы кеңесінің кеңейтілген отырысы өтті. Жиында Ассамблеяның Қоғамдық келісім кеңестерінің Үлгі ережесіне енгізілген өзгерістер мен толықтырулар жайы талқыланып, өткен жылы атқарылған жұмыстар қорытындыланды. 2015 жылда атқарылған жұмыстар мен 2016 жылғы міндеттерді, негізгі бағыттар бойынша баяндама жасаған Ассамблея хатшылығының меңгерушісі Мұрат Қалмұратов Ассамблеяның негізгі жұмыс жоспарын түсіндіріп, этномәдени бірлестіктерімен жасалынған жұмыстардың бір парасын айтып өтті. Облыс әкімі Бейбіт Атамқұлов бұл күні Оңтүстік Қазақстан облыстық Қазақстан халқы Ассмблеясы Қоғамдық келісім кеңесінің төрағасы етіп Бәйдібек ауданының тумасы, «Парасат», «Құрмет» ордендерінің иегері, қоғам қайраткері, Парламент Сенатының экс — депутаты Орынбай Рахманбердиев тағайындалды. Бірлігі мен татулығы жарасқан еліміздегі Ассамблеяның облыстағы филиал жұмысы осылайша бұрынғы сенатор Орынбай Рахманбердиевке аманатталды. Ендігі жерде, бұл ұйымның ынтымағы ұйысып, жүйелі жұмыстар жасалады деген сеніміміз мол. Кеңейтілген кеңесті қорытындылаған аймақ басшысы ел бірлігін бекемдеу жолында талмай еңбек етіп келе жатқан барша азаматтарға алғысын білдіріп, аудан,қала әкімдері мен Ассамблея хатшылығына Елбасы Жарлығымен бекітілген бірегейлік пен бірлікті нығайту мен дамыту тұжырымдамасын іске асыруды және әрбір ауылдық округте «Аналар клубын» құруды тапсырды.
