Қазақ жерінде тоғысқан дүниежүзінің озық технологияларын өз көзімен көруге асыққандардың қарасы қалың.
Астанаға ат басын бұрған шетелдіктер де көп. Қонақ үйлер меймандардан арылар емес. Мыңдаған келушінің арқасында елорданың бизнесі көтерілді. Қазынасы толды.
Қонақ үй жұмысшыларының бос уақыты жоқ. ЕХРО басталғалы қарбалас. Келушілер көп. Қонақтарға арналған 32 бөлме бар. Сұраныс жоғары. Әсіресе шетелдіктер көп келеді дейді. Кешеннің директоры екі жарым айдың ішінде қанша пайда тапқанын жасырғанымен, «1000-ға жуық қонақ күттік» деп отыр. Ал мұндағы нөмірдің құны 17 мыңнан басталып, 30 мыңға дейін жетеді.
Айгүл Нұреева, қонақ үй директоры:
— Алдыңғы жылға қарағанда біздің қонақ үйдегі қонақтардың саны ЕХРО-ға байланысты 4 есеге асты деп айта аламын. Алдыңғы жылы күніне 5 нөмір болса, осы жылы күніне 30 нөмірге дейін қонақ келеді. Біздің қонақүйге Германиядан, Сауд Арабиясынан көп келді. Біз олармен сөйлесеміз. Астана туралы сұраймыз. Қазақстан туралы сұраймыз. «Қатты ұнады» деп айтып жатыр.
ЕХРО көрмесі бизнесмендердің де несібесін еселеді. Көрмені тамашалауға келгендердің жүрек жалғап, аз-кем аяқ суытқысы келетіні белгілі. Қалашықтағы ас-ауқат сатылатын дүкендер мен мейрамханалар 560 мыңға жуық адамға қызмет көрсеткен. ЕХРО-ға келушілер 131 млн теңгеге тамақтанған. Ал жалпы тауар айналымы 900 млн теңгеден асады.
Виталий Косенчук, аспаз:
— Бастапқы тапсырма бойынша күніне шамамен 5 мыңға жуық адамды тамақтандыруымыз керек еді. Сенесіз бе? Біз қазір күніне 8 мыңға жуық қонаққа қызмет көрсетеміз. Кейде үлгере алмай жатамыз. Әсіресе түскі ас кезінде келушілер көп. Меніңше, шілдеде қонақтар көп болған сияқты. Біз тамызда келушілер легі азаяды деп болжаған едік. Олай болмады. Қонақтар әлі де келіп жатыр.
ЕХРО кезінде әлемнің түкпір-түкпірінен келген заманауи технологиялар көрмеге қойылып қана қоймай, олардың жұмыс істеу принциптері көрсетілді. Сол арқылы біз әлемдегі озық техниканың қай бағытта, қалай дамып бара жатқанына куә болып отырмыз.
Нұрсұлтан Назарбаев, Қазақстан Республикасының Президенті:
— Все наши гостиницы Астаны заполнены. Бизнес сейчас, по-молодежному говоря, «кайфует» от этого, потому что много людей. Масса народу, которая приехала, подняла бизнес. И поступления в бюджет города поднялись в несколько раз.
ЕХРО әлем халықтары арасындағы достықты нығайта түсті. Мамандардың айтуынша, халықаралық көрме еліміздегі ішкі туризмнің тамырына қан жүгіртті. Мәселен, көрме кезінде Бурабайға келген шетелдіктердің саны 3 есеге артқан.
Жабал Ерғалиев, ҚР Еңбек сіңірген қайраткері:
— Мұның өзі біздің өрісіміздің кеңейгендігі. Көзіміз ашылды. Қаншама мәдениеттерді көрдік. Қаншама технологияларды көрдік. Біз жер бетіндегі тыныштықты, мәдениеттерді жақындастыру арқылы халықтардың бір-біріне деген сенімін, бір-біріне деген сүйіспеншілігін нығайту арқылы бейбітшілікке қол жеткізетінімізді Елбасымыз айтып келе жатыр. Осы жолы да өзінің сұхбатында айтты.
Рахман Алшанов, экономика ғылымдарының докторы, профессор, академик:
— ЕХРО-ның әсері мол. Тек көрме емес, оның саяси бағдары, әлеуметтік бағдары, туристік жағы бар. Түркістанға биыл адам көп келгенін айтып жатыр. Сонда ЕХРО-ға келген адамдардың біразы Түркістанға барып жатыр екен.
«ЕХРО бізге не береді?» деген сұраққа жауап тапқандаймыз. Үш ай бойы әлем назары Астанаға ауды. Бизнес пен туризмнің тамырына қан жүгірді. Баламалы энергия саласындағы озық технологиялармен таныстық. Ендігі мақсат – көрген-білгенімізді көкейге түйіп, көштен қалмай «Болашақтың энергиясын» дамытуды қолға алу.
Дереккөз: 24.kz
