ҰБТ-дан шекті балл жинай алмаған түлектерге тегін кәсіптік білім алу мүмкіндігі берілмек

ҰБТ-дан шекті балл жинай алмаған мектеп түлектері мен жұмыссыз азаматтар колледждерде оқып, мамандық алуына болады.

Мұндай мүмкіндік «Баршаға арналған тегін кәсіптік-техникалық білім беру» жобасы аясында жасалады. Қазір еліміз бойынша орта арнаулы оқу мекемелерінде қабылдау жүріп жатыр. Білікті кадрлар дайындау мәселесі «100 нақты қадам» Ұлт жоспарының 77 қадамында айтылған. Жүктелген міндет бүгінде кезеңімен жүзеге асып келеді. Әйгерім Асқар Астанаға оқу іздеп, сонау Жаркенттен келді. Биыл 9 сыныпты аяқтаған ол білімін колледжде жалғастырғысы келеді. Қызының қолөнер мен тігіншілікке бейімін байқаған анасы да қолдау білдірген. Әйгерімнің қалауы – киім үлгісінің дизайнері болу.

Әйгерім Асқар:

— Интернеттен оқып, білдім. Дизайнер болғым келеді. Өзім ғаламтордан көріп, түрлі бұйымдарды көзмоншақпен жасаймын. Киім де пішіп үйреніп жүрмін. Оқып алсам пайдасын көретін боламын.

Жоғарғы оқу орнына түсе алмаған түлектерге де қамығудың реті жоқ. Олар қазіргі еңбек нарығында сұранысқа қарай дәл осындай жұмысшы мамандығын таңдай алады. Биыл 20 мыңнан астам мектеп түлегі кәсіптік-техникалық колледждерге барады деген болжам бар.

Жұмысшы мамандықтары тегін оқытылады. Әрине басымдық кәсіптік-техникалық салаға берілген. Барлығы 9 мамандық. Олардың қатарында дәнекерлеуші, маркетолог, аспазшы, дизайнер, тігінші, құрылысшы сияқты кәсіп түрлері бар.

1. Тамақтандыруды ұйымдастыру;
2. Нан пісіру, макарон және кондитерлік өндіріс;
3. Киім өндірісі және киім үлгісін жасау;
4. Ішік санитарлық-техникалық құрылғыларды, желдеткіштерді және инженерлік жүйелерді монтаждау;
5. Автомобиль көлігіне техникалық қызмет көрсету;
6. Ғимараттар салу;
7. Электрмен қамтамасыз ету;
8. Маркетинг;
9. Дәнекерлеу ісі.

Осы кәсіп түрлері бойынша тек Астананың өзінде мыңнан аса адам кәсіптік-техникалық колледждерге қабылданбақ. Бүгінгі күнге дейін оның тең жартысы құжатын тапсырды. Елордадағы 34 кәсіптік-техникалық білім мекемесінің 11-і осы бағдарламаға қатысады.

Салтанат Басығараева, Астана қалалық білім басқармасының бөлім басшысы:

— Жатақхана беріледі. Жолақысы төленеді. Шәкіртақысы да бар. Бұл өте жақсы мүмкіндік.

Айта кетейік, тегін кәсіптік білім алу мүмкіндігі барлық жұмыссыз жүрген қазақстандық азаматтарға арналған. Құжат қабылдау тамыздың 25-іне дейін жалғасады.

Дереккөз: 24.kz