Анталияға демалуға барған отандастарымыз қонақ үйге орналаса алмай, тентіреп қалды.
«ELITE CLASS» деп аталатын компания кеше өзін банкрот деп жариялады. Ал онымен Қазақстанда жұмыс істеген турагенттердің қызметі заңсыз болып шықты. Өзін банкрот жариялаған түркиялық туроператор Өзбекстан, Әзербайжан және Ресейден келген тағы жүздеген адамды тақырға отырғызды.
Инна Рей, «Туристiк қамқор» қорының төрайымы:
— Бұл компания ұсынған турпакеттердің бағасы неліктен бірден күмән келтірмегені түсініксіз. Өйткені олар өз қызметін өте арзан бағалаған. Нарықтағы бағадан 20-30% төмен. Сондай-ақ «ELITE CLASS» фирмасы жеңілдіктер акциясын да жаз ортасына дейін созып жіберді. Мұның бәрі күмәнді.
Бұл хабар Жерорта теңізіне демалуға барған жұрттың маңдайына тоқпақпен ұрғандай жайсыз тигені рас. Бірі «далада қаламыз» деп уайымдаса, енді бірі дипломаттарға хабарласуға асықты. Оқиға орнына жеткен Қазақстан консулы бұл істің кілтін бірден тапты. Сөйтіп Түркияның басқа туркомпаниясымен өз қаржы есебінен отандастарымызды қонақүйге орналастыратын болып келісті.
Әнуар Жайнақов, ҚР Сыртқы істер министрлігінің ресми өкілі:
— Осы «ELITE CLASS» компаниясы Қазақстандағы бірнеше туристік компаниялармен байланыста болған. Сондықтан біздің туристерімізге бір өтінішіміз бар. Шетелге шығар алдында қонақ үйдегі броньның барын қайта тексеруін сұраймыз.
Осыдан жарты жыл бұрын шетелге демалуға шыққан қазақстандықтардың құқықтарына кепілдеме беретін «Туристiк қамқор» жүйесі іске қосылды. Қор төтенше жағдай туғанда сыртта жүрген туристерді Қазақстанға қайтарумен айналысады. Оған отандық туроператорлар мүше болып, әр демалушы үшін 0,5 АЕК көлемінде жарна салуға міндетті. Әйтпесе, оның қызметі – заңсыз.
Инна Рей, «Туристiк қамқор» қорының төрайымы:
— «ELITE CLASS» – түркиялық компания. Демек біздің қорға мүше емес. Олар жұмыс істеген қазақстандық турагенттіктер де «Туристік Қамқор» жүйесіне қатыспайды.
«ELITE CLASS» басшылығы бұған бас ауыртқан емес. Қазір олар хабар-ошарсыз жасырынып жатыр. Сол себепті Түркия билігі оларға халықаралық іздеу салды.
Дереккөз: 24.kz
