Шымкентте мүгедектігі бар азаматтарға арналған 150 орындық жаңа оңалту орталығы ашылды. Мемлекет басшысының тапсырмасына сәйкес салынған нысан Бозарық шағынауданында 5,3 гектар аумақта орналасқан. Жаңа кешен медициналық оңалтудан бастап, 8 бағыт бойынша қызметтердің толық спектрін ұсынады. Жаңа орталықтың құрылысы 2024 жылдың желтоқсанында басталып, жоспарланған мерзімнен бұрын аяқталды. Жалпы аумағы 22 мың шаршы метрге жуық кешен бес блоктан тұрады. Мұнда оңалту корпусы, стационар, бассейн, спорт және акт залдары, асхана мен түрлі шеберханалар қарастырылған. Яғни, мұнда азаматтар тек ем алып қана қоймай, әлеуметтік ортаға бейімделіп, жаңа дағдыларды меңгере алады.
Орталықты арнайы мегаполис әкімі көріп, құрылыс сапасын қарады. Бүгінде мұнда физиотерапия, механотерапия, массаж, сумен емдеу, логопедиялық және психологиялық көмек көрсетуге арналған кабинеттер жұмыс істейді. Ал тігін, қыш және слесарлық шеберханалар қызмет алушылардың еңбекке бейімделуіне мүмкіндік береді. Емдік-сауықтыру бассейні бір мезетте 46 адамға дейін қабылдай алады. Спорт залы мен 150 орындық акт залы да қажетті құралдармен жабдықталған.
Орталық I және II топтағы мүгедектігі бар азаматтарға жартылай стационарлық форматта арнаулы әлеуметтік қызмет көрсетеді. Уақытша тұруға арналған екі қабатты стационарда бір және екі орынды бөлмелер бар. Оның ішінде мүгедек арбасын пайдаланатын азаматтарға арнайы бейімделген бөлмелер де қарастырылған. Кешен заманауи медициналық құрал-жабдықтармен қамтылып, тұрғындардың оңалту қызметтеріне қолжетімділігін арттыруға мүмкіндік береді.
