ӘЛЕМДІ МОЙЫНДАТҚАН СПОРТШЫ

Әзербайжанда өткен жасөспірімдер арасындағы грек-рим күресінен әлем чемпионатында шымкенттік балуан чемпион атанды. Үшінші мегаполистің халықаралық әуежайында жеңімпазды жақындары зор қошеметпен қарсы алып, жақындары ат мінгізді. Шымкенттік жас балуан Дияр Аманәлі Бакуде өткен әлемдік додада ел намысын абыроймен қорғап, Қазақстан қоржынына алтын медаль салды. Аталған жырысқа 60-тан астам елден 675 спортшы қатысқан болатын. Жарыс жолында азулы қарсыластарын жеңіп, финалда Мажарстан спортшысынан басым түсті. Төрт жасынан бері грек-рим күресімен айналысып келе жатқан Диярдың бұл жеңісі – табанды еңбегі мен тынымсыз жаттығуының нәтижесі.

Әлем чемпионын жерлестері ерекше құрметпен қарсы алды. Шымкент халықаралық әуежайында өткен салтанатты шараға спорт саласының басшылары, күрес федерациясының өкілдері, бапкерлері, туған-туыстары мен жанкүйерлері жиналды. Олар жас чемпионға ақжарма тілектерін арнап, жеңісімен құттықтады. Салтанатты қарсы алу рәсімі ел спортына деген құрметтің жарқын көрінісіне айналды.

Жас әлем чемпионының айтуынша, бұл – бастамасы ғана, алдағы уақытта да көк Туды әлемдік аренада желбіретіп, екі дүркін әлем чемпионы атануды мақсат етіп отыр. Жиын соңында әлем чемпионына ерекше құрмет көрсетіліп, жақындары тұлпар мінгізді. Сонымен қатар, жас чемпионның жеңісіне орай қала көшелерімен арнайы автокеруен ұйымдастырылды. Көк Туды желбіреткен көпшілік тарихи жеңіске қол жеткізген спортшыны зор қошеметпен қарсы алып, ыстық ықыласын білдірді.